E tratado ta regla e dunamentu di asistensia hudisial den kasonan penal entre EAU i Reino Hulandes.

AMSTERDAM/WILLEMSTAD — E komishon fiho di Hustisia i Seguridat di Tweede Kamer di Hulanda lo trata e konseptonan di dos Tratado otro luna, ku e estadonan Emiratonan Arabe Uní (EAU) i Reino Hulandes a sera na Abu Dhabi dia 29 di ougùstùs aña pasá.

E reunion ta planiá pa tuma lugá den mèrdia di 1 di desèmber próksimo. Ta trata aki di e Tratado ku ta regla ekstradishon entre e dos estadonan ku Vigilante a publiká ayera tokante di dje, pero tambe e tratado ku ta regla asistensia legal (rechtshulpverzoek) entre e dos estadonan.

E tratado ta regla e dunamentu di asistensia hudisial den kasonan penal entre EAU i Reino Hulandes. E tratado ta pèrmití ámbos estado hasi petishon pa asistensia legal pa tur tipo di delito. Esaki por basta e investigashonnan solisitá ta sirbi e meta dje investigashon penal realisá den e estado ku a hasi e petishon, i semper si e investigashonnan aki ta posibel konforme e derecho di proseso penal nashonal. E tratado tin tambe komo ophetivo, hasi ku e koperashon entre e outoridatnan di EAU mas suave i rápido.

Raad van State di Reino ta señalá den su konseho ku e aprobashon di un tratado di asistensia legal komun ta presumí entre otro ku ta eksistí un konfiansa ku ta respetá e derechonan humano fundamental di e personanan buská den e estado ku ta pidi e asistensia legal. E konfiansa akí ta reflehá den e restrikshon di e revishon hudisial dje petishonnan di asistensia hurídiko individual. Pa e motibu aki ta importante pa gobièrnu evaluá kuidadosamente e situashon di derechonan humano den e otro estado, ora ku ta bai firma un tratado bilateral.

Ku mira riba e aprobashon parlamentario dje tratado, Raad van State a konsehá gabinete Rutte 4 pa ekspresá e konsiderashon akí den e splikashon di gobièrnu, esta e memorie van toelichting. E splikashon akí no tabata indiká ku a hasi e evaluashon akí. I ya komo ku lo por hasi preguntanan tokante e situashon di derechonan humano den EAU, Raad van State a konsehá pa pone atenshon den e splikashon na e situashon akí. 

A base di e konseho di Raad van State, gobièrnu di Hulanda a amplia e splikashon ku un paragraf, ku ta kontené un bista mas serka tokante e base polítiko dje tratado. Minister di Asuntunan Eksterior di Hulanda Wope Hoekstra na Tweede Kamer: “A inkluí e paragraf akí tambe pa aklará mas tantu e nesesidat di un koperashon mas intenso ku paisnan pafó di Europa ku no ta EAU, pa kombatí krímen ku ta mina. E diversifikashon dje tipo di krímen akí ta rekerí un koperashon hudisial mas intenso ku EAU di loke ya ta posibel, pa ku e base dje tratadonan multilateral na kua ámbos paisnan ta forma parti.”

Segun gobièrnu Hulandes Raad van State ta pretendé den su konseho ku e splikashon di gobièrnu ta pone atenshon solamente na e sirkunstansia ku pena di morto i kastigunan korporal ta eksistí na EAU, i ku e tratado ta sòru ku por ninga ekstradishon si no por duna garantianan den e kasonan ku e kondena tabata pena di morto òf kastigunan korporal. “Gobièrnu ta pensa ku esaki ta demostrá ku a interpretá e splikashon i e tratado di forma demasiado restriktivo. A inkluí un paragraf den e splikashon tokante e aspektonan di derecho humano dje tratado. E paragraf akí ta splika kon e tratado ta relashoná ku e prinsipionan fundamental di derecho i e Pakto Internashonal di Derechonan Sivil i Polítiko.