SZEGED – Despues di dos aña, ainda e konflikto andando entre Rusia i Ukrania ta sigui trese su konfliktonan kuné riba e aria deportivo.

Resientemente Ukrania a protesta kontra partisipashon di deportistanan di Rusia i Belorusia na e torneo di klasifikashon olímpiko di kanotahe ku ta tuma lugá na Szeged, Hungria.

Den un karta na Komité Olímpiko Internashonal (COI), minister di deporte Ukraniano Matwij Bidnyj i e presidentenan di komité olímpiko i e federashon di kanotahe di e pais parsialmente okupá pa Rusia ta demanda e eksklushon di nuebe deportista.

Kyiv ta indiká ku partisipashon di ámbos pais na e kompetensia di ekipo ta prohibí pa COI. E prohibishon aki ta aplikabel pa otro deporte tambe. Aña pasá e direktiva di Federashon Internashonal di Kanotahe (ICF) a disidí pa permití partisipashon di deportistanan di Rusia i Belorusia, “ku no ta sostené e akshonnan di nan pais den Ukrania”, komo atletanan individual neutral.

ICF a indiká ku nan no ta violá e reglanan. “Nos ta definí ekiponan di un manera diferente den nos reglanan. E tripulashon individual, dòbel i di kuater ta ser konsiderá komo boto ditripulashon i no un ekipo, manera ta den e kaso di ‘kanopolo’ of kompetensia di ekipo den ‘kanoslalom’”, asina Thomas Konietzko, presidente di ICF, a splika na e agensia di notisia Aleman dpa.

El a enfatisá ademas ku tur deportista di Rusia i Belorusia ku ta partisipá na e torneo aki “a keda kontrolá pa e komishon independiente. Algun no a logra pasa e kòntròl”.