Tenso: korte ta identifiká situashonnan tenso na Kòrsou, durante kiebro den relashonnan entre pareha. Hues a ekspresá su preokupashon.

Nieuwe Haven—Diskushon riba un Paracetamol, a okashona mas di 30 mil florin na daño. Riba 6 di Yanüari último, e hòmber Vernon “Juni” Heyliger a pèrdè kabes i kima kas di su eks pareha Marelva W. na Krakeel 31, pa motibu di 1 paracetamol.

Korte Penal den Promé Instansha (hues mr Snitker), ayera a trata e kaso di Ministerio Públiko kontra di Heyliger (nase 17 desèmber 1973). Ta bin sali na kla, ku Heyliger i e dama Marelva W. tabata den un relashon ku tabata kabando. E pareha riba 6 di Yanüari 2023 a pleita riba un Paracetamol despues ku unu di e yunan tabatin keintura. E diskushon, tabata pa un Paracetamol, segun Heyliger unda riba e anochi spesífiko tabatin problema kaba. Tabatin un diskushon na dado momento riba un yu malu i Heyliger a súplika W. pa trese un paracetamol. A surgi un diskushon unda segun, Heyliger, a eskala i pa tal motibu e kosnan a eskala. Riba anochi di insendio, e yunan tabata na kas di Heyliger i tabata pa e motibu ei ku Heyliger por a kima e kas di Marelva W, pasobra no tabatin niun hende na kas.

E deklarashonnan di Heyliger ayera, no tabata muchu klaro, pero por a dedusí ku e pareha tabata separando i riba 6 di Yanüari e kosnan a bin eskala. Heyliger a splika tambe ku W.  mester a trese e Paracetamol pero na dado momento e dama a dal’é ku e bòter. E pareha a traha un afsprak ku entre 1 pa 6 di yanüari, e muchanan mester a keda serka Heyliger. Pero Heyliger a bin konstatá ku W., e anochi riba 6 di yanüari, tabata den Festival Center. Einan e tabata sa ku na Krakeel no tabatin niun hende na kas, unda e tabata por a bai kima e kas sin pone niun hende su bida na peliger.

Despues di e insendio, ekspertonan a konstatá bastante daño. Heyliger a start e kandela kimando un kortina den kas. Hues Snitker a menshoná segun e rapòrtnan a señalá mas ku 30 mil na daño material i imaterial. Heyliger a splika hues, ku e ta dispuesto na paga tur e dañonan. Segun Heyliger, e paracetamol a bira un problema pasobra e mes no tabatin outo. E la súplika, pa W. trese un paracetamol pe. Einan e diskushonnan a inisiá. I despues di e diskushon, Heyliger a bai baha un kliente di dje na Sta Maria, unda e la opta pa bai Krakeel i sende kas di W. na kandela.

E víktima W. tambe tabata den korte ayera. Aparte di e daño material, segun W.  tabatin daño emoshonal. Unu di nan yunan ta outista i pa e yu aki, e kambionan ta difísil. Ya kaba e kambio di separashon tabata hopi difísil p’e i nunka e la imaginá ku Heyliger por a yega asina leu. Su yunan no ta trankil mas i nan no por alohá nan mes pasobra e resultadonan tabata kaótiko. Kosnan mester a bai asina leu ku segun W, na dado  momento e tata a hinka e yunan den outo i kore rònt splikando di ta bai kometé suisidio. W. a trata na bai tratamentu kuné, pero hopi kos bon i malu a sosodé, e eks di Heyliger a duna di konosé. Pero e daño okashona a krea hopi doló segun W. I einan e no por konfia Heyliger mas ku su yunan. “Kosnan a bira demasiado”, W. a duna di konosé.

Segun Heyliger na dado momento, tabatin rumornan ku te a kima e kas na promé okashon. Riba 6 di Yanüari, e tabatin mester di baha un kliente na un snek na Sta. Maria. E la bolbe risibi un yamada, unda nan a akus’é di a kima e kas na promé okashon i einan e la pèrdè su kabes.  Einan el a rabia i pèrdè kabes kue direkshon Krakeel 31. Segun Heyliger, e la drenta den e kura bai paden i sende un kortina na kandela. E tabatin un laiter den e outo i kuné el a kima e kas, tabata algu di “satanas”, e la bisa ayera.. Tabata fásil yega na e kortina, pasobra W. su bentana tabata kibrá. Segun fiskal, e insendio a pone mas hende su bida den peliger, pero Heyliger a splika ku no tabatin niun hende den e kas. Promé ku e la drenta, e la chek si no tabatin niun hende na kas.

Ayera hues a presentá na e akusado un konseho di reklassering, esta pa Heyliger risibi tratamentunan sikológiko. Segun fiskal di Ministerio Públiko, e akusado a kambia su deklarashonnan. E fiskal a splika, ku tin sufisiente prueba i grabashon pa prosesá e kaso kontra di Heyliger. E akusado mes a atmití i riba grabashon por mira tambe kon el a sende e kortina na kandela. Fiskal mr. Dennaoui a splika korte ayera ku Heyliger a sende e kas unda su yunan ta biba na kandela. E por yora kuantu ku e ke den korte, pero Ministerio Públiko ta wak otro kos. Heyliger ta kulpabel i meresé un kastigu, segun mr. Dennaoui. E eksperto den lei penal, kende atraves di tempu tin eksperensia amplio den tipo di kasonan asina, a splika hues ku Heyliger tin un problema pa kontrolá su agreshon. Sende un kas na kandela ta un tendensha peligroso. Fiskal a súplika 36 luna kual 12 luna kondishonal i tempu di prueba di 2 aña. Fiskal ke tambe pa e akusado keda bou di guia di reklassering miéntras lo imponé reglanan di prohibishon i restrikshon pa Heyliger no aserka e víktima sra. W..

Heyliger, na diferente momento tabata yora ayera den korte i súplika despensa na su eks pareha i komunidat di Kòrsou. E ta un tata di 15 yu i ta lamentá profundamente lokual a sosodé. E la bisa ayera di a pèrdè su kabes kompletamente i kier paga tur daño okashona. Su abogado mr Dickens, tambe a súplika korte pa konsiderá e aspektonan sosial di su kliente. Segun reklassering e mama i yunan a sufri hopi daño i ta tratando na rekuperá. Nan keda sin paña por ehèmpel i e dama víktima ta trahando tres trabou awor pa e rekuperá.

Heyliger a kai será riba 31 di yanüari, algun siman despues di a pega e kas na kandela. Enkonekshon ku e kandela intenshonalmente pegá, djárason 31 di yanüari 2024 alrededor di 10.42’or polis a hasi su detenshon. Mesora despues di e suseso ariba personal di e tim di reshèrshi di Barber a kuminsá ku un investigashon ku a guia na e sospechoso. Riba 31 di yanüari e tim enkargá ku e investigashon riba òrdu di fiskal di Ministerio Públiko Dennaoui, a tene un entrada hudisial na Oost  Jongbloed  i a detené e Juni Heyliger di 50 aña di edat nasé na Kòrsou. Durante di e entrada hudisial  a haña i konfiská artíkulonan ku ta importante pa e investigashon.

Heyliger, durante su último palabra a súplika Korte pa tene kuenta ku su negoshi i será largu den prizon  ta pone e negoshi den peliger. E tin un kompania pa hür outo ku ta paga impuesto. Su situashon di hernia tambe ta afektando su bida personal pasobra no tin e tratamemtunan adekuá. Hues mr Snitker ta tuma dos siman pa tuma desishon.

Hues mr Snitker a yega na 24 luna kual 18  ta kondishonal i Heyliger mester keda bou di tratamentu na reklassering. Prohibishon di kontakto pa 1 aña largu for di sra. Marelva W. Tambe Heyliger ta keda riba un tempu di prueba durante 36 luna. E desishon di hues a nifiká ku Heyliger mester sinta 6 luna den prizon. Mirando ku e tabata enkarselá for di 31 di Yanüari 2023 e ta sali promé ku final di Yüli próksimo. Tambe e mester paga e daño na 15 mil florin. Fiskal di Ministerio Públiko por inisiá un proseso pa daño perwisio.