Kondishon: empleadonan di Selibon pafó di korte siman pasá. Kondishonnan di trabou na Selibon no a kai muchu na agrado di wes.

Nieuwe Haven—Wes mr.  Pieter de Kort, djaweps último 10 or di mainta a trata un wisio sumario na Kòrsou mediante tele konferensha ku sala di Korte na Boneiru. Tabata trata di un wisio unda e kompania estatal di limpiesa,  Selibon a súplika korte pa demandá su empleadonan bek na trabou.

Ta trata di un wèlga ku tabatin Boneiru bastante prekupá unda partidonan no tabata por a logra haña otro pafó di korte. Pieter de Kort, kende aktualmente ta unu dje tòp wesnan den disputanan sivil, a logra pone partidonan na mesa sin tabatin mester di un veredikto. Despues di a skucha ámbos banda djaweps último, tantu den promé rònt di alegashon i despues den réplika, e ábil wes a proponé partidonan pa tene un periodo di konsulta te ku 5 di mei próksimo i evitá un veredikto den korte. E wes a duna e partidonan 5 minüt pa konsulta pa despues bini bek sala.

Miéntras e sindikato AFBW mediante nan abogado mr. Edward Winkel tabata di akuerdo ku e proposishon di hues, Selibon a eksihí tòg un veredikto mediante nan abogado van Hout. Segun Selibon, e proposishon di e wes no tabatin sentido pasobra na momento posponé un veredikto pa negoshá e sindikato ta bolbe bini bek riba mesun puntonan ku ya e mediadó mes no tabata por a logra solushoná.

Wes de Kort a splika Selibon ku na e momentonan aki no tin un sentido di duna veredikto, mirando ku tin diferente motibu bálido pa un wèlga, pero ku e wèlga no ta defendé interes general na Boneiru, prinsipalmente pa e kousa di problema den salubridat públiko. Ademas, tin tambe e posibilidat di entamá un proseso a fondo ku alabes ta bolbe alargá e proseso. De Kort ta haña ku un negoshashon intermediario promé ku un veredikto ta e mihó solushon i si partidonan di yega na un entendimentu promé ku 5 di Mei, e ta pone un veredikto. Es mas, segun e wes durante e periodo ei, e empleadonan no por wèlga tampoko sino ta bini un veredikto i nan mester bai bek trabou.

Lokual e wes a proponé tabata pa na promé lugá tur trahadó bai traha i obligá Selibon pa sigui na mesa ku e sindikatonan. Selibon a sigui protesta e solushon di e wes. Segun nan direktor, Rudsel Leito, su kurpa no ta muchu bon i tin hopi stress i ta mihó yega na un desishon di korte mediante un veredikto. Selibon, tabata opvio di kier a sali korte ku un veredikto di viktoria den nan man, pa mustra ku empleadonan mester bai traha bek, pero de Kort a mira e kosnan otro. Al final, e wes a manda un mail pa ámbos partido ku e puntonan di diskushon i si nan bai di akuerdo, ta posponé un veredikto te ku 5 di Mei próksimo. Den oranan di atardi, e partidonan a opta pa tòg sigui e kurso skoh’é  pe wes pa bai na mesa, miéntras ku no por wèlga te ku 5 di Mei, pendiente un solushon.