Eugene Rhuggenaath promé minister di Kòrsou. Hulanda a finansiá 700 mion durante 2020.

Punda—Awor ku Hulanda ta sera i habri su portanan, konforme reakshon riba Covid 19 i ku un blokeo pa tur lokual ta trata negoshi for di Venezuela, 2021 tampoko no ta mustra bon pa Kòrsou. Sigur no e promé mitar di 2021.

Tantu na nivel mikro komo makro, si Covid-19 mantené su presensha i gobièrnu insistí riba medida di intervenshon, lo tin mal resultado. Gastamentu konsumptivo lo bira asina mínimo ku hopi kompania chikí i medio ta kore riesgo serio di drenta e proseso pa yega na bankarota. E sla mas dirèkt lo ta kompanianan ku t sirbi sektor di turismo miéntras indirekto tur kompania ku ta duna servisio i produkto na e kompanianan ku ta sirbi e sektor turístiko.(

Manera Vigilante a bini ta splika, a yega tempu pa nos kuminsá profundisá kon lihé Covid -19 por multipliká su mes sin intervenshon i si no ta na tempu pa por para su multiplikashon. Manera dr Izzy Gerstenbluth a splika, e indikadó multiplikadó R di Covid-19  mester keda bou di 1, pero esaki ku medidanan di intervenshon.  E úniko manera sigur ku ta retrasá frekuensha di infekshon ta intervenshon. Unu dje èrmèntnan mas efektivo ta distanshamentu sosial, ku otro palabra kibra tur aglomerashon sosial di hende na Kòrsou. Pa tal motibu gobièrnu a haña nesesario pa inisiá e proseso di “pone Kòrsou den kandal” i prevení tur kontaktonan sosial ekonómiko, kual a enserá introdukshon di e medidanan di intervenshon.

Pero di un parti e medidanan ta duna Covid-19 mas problema pa multipliká na Kòrsou i kousa infekshon. Di otro banda e medidanan di restrikshon lo kousa daño severo na diferente sektor ekonómiko durante 2021, prinsipalmente ekonomia. Segun dr. Izzy Gerstenbluth e proseso pa kombatí Covid-19 via di distanshamentu sosial por dura largu. Segun redakshon di Vigilante, largu ta nifiká mas largu ku 9 luna, saliendo for di punto di bista ku e proseso di bakunashon ta tuma mas largu.  Den 6 luna, mayoria hotèl por tene nan portanan habrí si Hato no tin buelo for di Hulanda. Kombiná ku un paro den yegada di barkunan krusero, limitashon den operashon di restorant i kasino, mas persona lo pèrdè trabou den 2021.