Brasilia,– E mondi di Amazonia kual hopi hende ta konsiderá e pulmon di nos mundu por disparsé pa 2064. Konstrukshon, krisis di klima i destrukshon di mondi pa palu tur ta rason nan ku Amazonia ta birando ma chikitu.

Aparte ku tin rosamentu di e mondi pa produkshon di palu, un otro aspekto ku ta destruí e Amazonia ta e sekura ku ta lantando den e region. Ekspertonan a diskubrí un sirkulo visioso kaminda ku na momentu ku tin mas rosamentu tin un redukshon di humedat i áwaseru den e mondi. Esaki ta sòru pa un oumento den e temporada di sekura kual lo ta mas desastroso ainda pa e palunan den e region.

Segun ekspertonan, tin área nan di e region di Amazonia ku ta dura kasi 4 aña pa restorá despues di un periodo largu di sekura.

Na 2012 Brazil tabata kontrolá rosamentu di Amazonia basta bon. Brazil tabata tin diferente instrumento gubernamental ku tabata atministrá e rosamentu pa evitá di kousa daño pisá den e region. Despues ku gabinete Bolsonaro na Brazil a yega na poder, su gabinete a redusí e trabounan di e instrumentonan aki i asina a sòru pa rosamentu di Amazonia bira un problema grandi atrobe.

Presidente Bolsonaro ta di opinion ku e otro paisnan mester stòp di kumpra palu di Brazil pa asina stòp di kontribuí na rosamentu di Amazonia i e paisnan aki mester stòp di tira falta riba Brazil debí ku no ta Brazil tin e merkado di palu mas grandi na mundu.

Ekspertonan di medioambiente ta bisa ku na momentu ku 30% pa 50% di Amazonia a wòrdu rosá, esaki lo kousa ku 40% ménos áwaseru lo kai i ménos áwaseru lo ta desastroso pa e region aki.