Tog: despues di a rechasá un proposishon den korte djaluna, riba djamars partidonan a yega na un areglo.

Ararat—E kompanianan Terramobile i ATM/TeleCuracao a yega na un akuerdo riba un disputa ku djaluna  último a yega korte. E akuerdo a yega despues ku intentonan di hues mr Solange Christiaan no a logra pa pone partidonan kumbiní un periodo di grasia.

Pero na Ararat, kosnan a sigui otro. Manera publiká den Vigilante djaluna último. Antilliaanse Televisie Maatschappij (TeleCuracao) i Terramobile, tin un disputa di 80 mil dòler riba hür retrasá. Esaki tabata  bálido pa e periodo di 2022 i 2023. Debí ku e problema no tabatin solushon, ATM mediante nan direktor interino Johny Loefstop a bai ku nan abogado, mr Bertie Braam dilanti hues mediante un wisio sumario.

Unabes na Korte, Wes mr. Solange Christiaan a trata e wisio sumario unda e la skucha den prome tanda, ATM i Terramobile den segundo tanda kende a keda representá pa su direktor Donald Dindial. Despues di a skucha ámbos testimonio, e wes a proponé un solushon ku no a logra pasa mesa, despues ku Loefstop a eksihí un finalisashon di e kontrakt entre partidonan. Ta asina ku entre ATM i Terramobile tin un kontrakt di hür, unda Terramobile ta hür un espasio pa nan sentro di distribushon. Terramobile ta un kompania ku derechinan pa ópera un distribushon pa señalnan selular i telefonnan riba liña fiho. Aparte di espasio, nan ta hür tambe e antena (mast) di ATM.

Direktor di Terramobile, Dindial a splika ku na prome lugá nan a dil ku tres direktor na ATM, i tabata trata di un areglo di “revenue sharing” unda a keda kumbiní ku Terramobile ta start pagamentu asina nan kuminsá ópera riba e merkado selular. Pero, e pèrmitnan pa kuminsá ópera na a tuma mas tempu i konsekuentemente. Terramobile ta rekonosé e debe pero alabes a splika korte ku nan no ta presente den e espasio na Ararat pero tampoko ta uzando e mast  di ATM.

Wes mr. Solange Christiaan, despues di a skucha ámbos partido, a proponé alternativa prome di yega na un veredikto. Segun e wes, ATM tabata kobrando Terramobile hür adelantá. Pues, ainda e tèrmino di 2023 no a finalisá, pero partidonan a kumbiní ku na inisio di aña Terramobile mester paga e hür adelantá i ta trata di 40 mil dòler anual. Pero segun e wes, unabes Terramobile ta den e lugá ainda, ATM por warda te Novèmber próksimo pa duna Terramobile oportunidat di yega i regla su finansiamentu. I si esei no sosodé, ATM tin un órden di korte pa kibra e kontrakt i obligá Terramobile di sali. E proposishon di e wes tabata basá riba e hecho ku Terramobile tin un kontrakt di hür pero físikamente no tabata operando. Anke e la apuntá na Terramobile ku nan tin un kontrakt i mester kumpli ku e obligashonnan.

Terramobile a bai di akuerdo ku e wes. E kompania a entrega korte tur dokumentashon tambe riba nan petishonnan di finansiamentu na e dos bankonan di desaroyo. Segun Bertie Braam, den e kartanan di banko no tin garantia riba e finansiamentu i ku ATM no por bai riba esaki pa gèmbel riba nan pago.

Entretantu, riba djamars último e partidonan a yega na un akuerdo. Kontenido di e akuerdo no ta konosí, pero proseso di veredikto den korte ta sigui pendiente e areglo entre e partidonan.