Willemstad, — E barku krusero di e liña krusero Princess Cruises, Regal Princess, a bishitá Kòrsou riba djaluna 30 di òktober pa promé biaha. Komo ku ta promé biaha e barku krusero aki ta bishitá Kòrsou, Curaçao Ports Authority (CPA) huntu ku agente di e barku Armada Port Agency tabata tin un seremonia inougural a bordo di e barku pa un interkambio di plakat.

Durante e seremonia aki representantenan di CPA, Minister di Desaroyo Ekonómiko, Sr. Ruisandro Cijntje, Presidente di Hunta di Komisario di CPA, Sr. Robert Candelaria i agente di e barku Armada Port Agency, a yama bon biní na Regal Princess, Kapitan di e barku i su tripulashon. Regal Princess tin un kapasidat di 3.604 pasahero krusero i a bishitá Kòrsou ku un kantidat total di 3.092 pasahero a bordo. E barku a sali Fort Lauderdale dia 24 di òktober último pa un biahe di 12 dia i ta kulminá dia 5 di novèmber próksimo na Galveston, Texas. Keda na altura di yegada i salida di barkunan krusero dor di ‘download’ e CPA Cruise app.