Produkshon di hidrógeno por ta un produkto interesante pa eksportá.

Willemstad, —  Kòrsou tin e kapasidat pa produsí energia sostenibel pa produsí energia limpi i duradero.  Diferente proyekto ta andando pa asina por realisá uso di energia sostenibel kaminda eksportashon di e energia tambe lo bira realístiko.

Aktualmente gran parti di mundu ta usando gas natural pa kushiná i pa tene nan kasnan kayente durante periodonan friu. Gas natural ta wòrdu di pòmp for di tera, pero meskos ku krudo, gas natural tambe ta birando mas skars. Komo produkto alternativo, siensia a prueba ku produkshon di hidrógeno por remplasá gas natural mirando ku produkshon di hidrógeno tambe por wòrdu usá pa kushiná i tene kasnan kayente durante periodonan friu. Sinembargo, por usa hidrógeno komo remplasante “bèrdè”di gasolin pa outo tambe.

Un investigashon na 2021 a verifiká ku e merkado di energia na Latino Amérika tambe ta moviendo den direkshon pa transformá nan sistemanan di produsí energia. Diferente pais Latino a krea diferente meta riba e aspekto di energia kaminda e metanan ta inkluí ménos dependensia riba produkshon tradishonal di energia.

Ademas, e investigashon a nota ku Latino Amérika ta bai demandá 66% mas hidrógeno pa 2030. Segun e investigashon aktualmente e paisnan Latino ta demandando 4 mil kilotòn di hidrógeno pa aña, pero pa 2030 e demanda ta oumentá na 6700 kilotòn pa aña.

Produkshon di hidrógeno lo ta e katalisadó pa un transishon rápido di 100% di fuentenan di energia renobá na Kòrsou. Hidrógeno no tin kolo òf oló i por wòrdu wardá i transportá na forma líkido òf den forma di gas. Si apliká  hidrógeno den vehíkulonan manera outo òf bùs, esakinan lo kore riba energia limpi kual ta produsí solamente bapor di awa komo emishon. Den e transishon di energia, energia hidrógeno por ta e remplasante realístiko di gasolin i/òf gas natural.

Banda di ambishon pa produsí hidrógeno Kòrsou a tuma pasonan importante pa  eksplorá e posibilidat di generá energia sostenibel asina kuminsá ku transishon di energia. Esaki sigur ta bon notisia despues di algun desakuerdo riba proyektonan basá riba energia sostenibel aki na Kòrsou. Bou di proyektonan sostenibel ta kai entre otro un proyekto di 6 bus elektróniko ku lo bai kore a base di generashon di energia for di solo. Plan pa e proyekto a ser realisá pero e proyekto mes ta andando ainda.

Un otro proyekto ku ta kanando ta e proyekto di molinanan riba laman. Den luna di yüni último, gobièrnu di Kòrsou, a tuma un paso importante pa eksplorá e posibilidat di generá energia ku molinanan di bientu riba laman. A a hasi un estudio geofísiko den luna di yüli di e fondo di laman di e awanan rondó di Kòrsou. E área di investigashon ta ekstendé te na frontera di e Zona Ekonómiko Eksklusivo di Kòrsou i e fronteranan di Venezuela, Aruba i Boneiru. E estudio aki ta den su fase inisial pero ta sumamente importante pa realisá energia duradero basá riba bientu.

E ambishon pa bira lider regional den produkshon di hidrógeno bèrdè usando energia di bientu ta resultá for di un estudio realisá pa TNO, un organisashon independiente hulandes ku ta realisá investigashonnan sientífiko apliká. Kòrsou, dor di su posishon geográfiko i kondishonnan di tempu, tin un oportunidat úniko pa logra rendimentu máksimo den generashon di energia di bientu.

Den region, Kòrsou, huntu ku Hamaika, Islanan Cayman, i Barbados ta forma un ehèmpel pa ku inovashon den energia ku ta limpi I duradero.  E paisnan menshoná ya a kuminsá ku proyektonan sostenibel den infrastruktura ku ta resistente pa kambio di klima i ku lo ta benefisioso pa e region.