Alexandra van Huffelen, te ainda no menshoná kuantu sèn Hulanda ta bai fia Kòrsou pa finansiá kontinuidat di Ennia. Tampoko e la konsiderá e balor di aktivonan bou di beslag, inkluso balor di Mullet Bay.

Gorsiraweg– Ta konosí ku tantu Parman International komo Banko Sentral a apstené di bai mas profundo den korte riba invershon nan di Hushang Ansary. No solamente den Kirby Corporation sino tambe den un di dos kompania, Nabors Industries, no tabatin detaye di e invershon.

Un miho bista riba e balor di ámbos invershon, por trese un mihó komprondementu dikon òf kuantu sèn Kòrsou mester bai fia. Un grupo di yu di Kòrsou kombiná  ku representantenan estado unidense mester a pone nan firma bou di dokumentonan ofishal pa Hushang Ansary por a trese kambionan den su bolsa di invershon. E bolsa di invershon tin un balor kuantioso i parti di esaki ta bou di beslag pa Banko Sentral.

Entre yüni 2017 pa òktober 2017, Hushang Ansary a opta pa trese un kambio den su konstelashon di invershon. Pa por a logra esaki, tur direktor huntu ku nan apoderadonan den e konsorsio di Ennia na Kòrsou i Parman na Estádos Unídos mester a firma. Segun dokumentashon ofishal di e Komishon Estado unidense ta trata di representantenan na Ennia Caribe Holding, EC Investments BV, Parman International BV, EC Investments International Sarl (Luxemburgo), Parman Capital Group LLC,  Parman Enterprises LLC, Kirby Corporation (USA). Den un di dos dokumentashon di kambio serka e grupo di invershon, mester a firma direktornan i representantenan di Parman, Ennia Caribe i tambe di Banco di Caribe huntu ku Banco di Caribe Investments BV.

Tur e kompanianan ariba menshoná ta forma parti di e konsorsio di Parman, kual Hushang Ansary tin mayoria akshon i ta alabes doño di Ennia Caribe Holding na Kòrsou. E grupo di Ansary, ku entretantu tabata wòrdu manehá pa direktornan di e kompanianan di Kirby Corporation, Nabors Industries i su yu muhé, a pone nòmbernan di yunan di Kòrsou prominente riba dokumentonan, pa firma tres traspaso di interes bionario den konstelashon di grupo Parman di Ansary. E prome ta benta di akshon den un “sell and purchase agreement” entre Stewart and Stevenson (Parman)  Kirby Corporation. E di dos ta konserní atkishon di 8.8% di grupo Ansary den Kirby Corporation. E di tres ta konserní atkishon di 6.7% di grupo Ansary den Nabors Industries. E balor kombiná riba Merkado di Kapital pa ámbos kompania ta surpasá 6 bion dòler estado unidense. Kirby Corporation ta balorá na 4 bion dòler miéntras Nabors ta balorá 2.2 bion dòler. Pa por a traspasá e akshonnan pa Ansary, direktornan yu di Kòrsou mester a firma e dokumentonan. Tantu Kirby Corporation komo Nabors Industries ta dos kompania sólido na Estado Unídos.

E intenshon di Hushang Ansary entre 2017 pa 2018? tabata pa trese kambio den su bolsa di invershon. Ta trata di dos interkambio konfirmá pa Reuters. 13 di sèptèmber 2017 Hushang Ansary a raportá un tomo pasivo di 8.8% den Kirby Corporation. I riba 6 di novèmber 2017 Reuters ta anunsiá  ku Ansary, un biaha mas ta raportá un tomo pasivo di 6.7% den Nabors Industries. Nabors ta balorá na 2.2 bion dòler. Dokumentashon den poder di Vigilante, ta indiká ku pa ámbos tomo pasivo por a tuma lugá, mester tabatin firma di tantu direktornan lokal di Ennia i di Banco di Caribe. Na 2018 tambe a finalisá algun transakshonnan pa Kirby.