Bosero ta konfirmá 2 morto den tráfiko
January 30, 2021 • 1 minüt pa lesa
Sta. Maria—Bosero di polis Imro Zwerwer a konfirmá na reportero di Vigilante Ree Isbertha ku durante oranan di mardugá tabatin dos morto di tráfiko. Ámbos a tuma lugá den área di St. Maria.
E promé morto a tuma lugá na altura di Alves Supermarket riba Rooseveltweg na momento un dama shofùr a pèrdè kòntròl i bòltu su vehíkulo. E di dos morto a tuma lugá tambe den oranan lat di mardugá na momento un vehíkulo ta alkansá un peaton.
Pa lokual ta trata e morto riba Rooseveltweg Zwerwer a informá ku tabatin 3 persona den e vehíkulo kual 2 ta for di peliger i ta na CMC hasiendo chekeonan médiko. Pero e di tres persona, e dama shofùr kende ta di nashonalidat kolombiano a bin fayesé. Segun Zwerwer for di yegada di e promé patruya di polis ya a konstatá ku e dama no tabata duna señal di bida. Polis a bin haña e vehíkulo di bòltu riba e lugá pa stashoná outo na di Alves Supermarket. E bosero no tabata por a duna detaye i bisa ku e aksidente ta wòrdu investigá.
Riba Moonchiweg tambe apénas 3 ora despues e bosero a bolbe konfirmá un di dos morto den trafiko. Un vehíkulo lo a alkansá un peaton den oranan di mardugá. Segun Zwerwer ta e shofùr mes a yama na sentral i bisa ku el a dal un hende kanando riba kaya pa manda un patruya. Na yegada por a nota ku tabata trata di un dama kende no a duna señal di bida. Zwerwer a bisa ku e kaso aki tambe ta wòrdu investigá.
