Willemstad,– Apesar ku na Kòrsou bo no ta tende masha mas toka te di Covid, mirando ku e kasonan positivo a baha, mester bisa si ku ketu bai Covid ta presente i ta sigui kobra morto tantu na Kòrsou, Aruba komo Boneiru.

Na Kòrsou te ku 14 di februari tin 22 morto kousá pa e vírùs. Na Boneiru nan a registrá nan di kuater víktima, miéntras ku na Aruba e kos ta mas alarmante i ya nan a yega 68 morto pa motibu di Corona Vírus.

Na Aruba Directie Volksgezondheid a informá ku 20 persona a rekuperá, a registrá un total di 32 kaso nobo di COVID-19, di kual 4 no ta residente. Nan ta bisa na Aruba ku e kantidat di no residente positivo ta enserá esnan no residente ku ta tèst na aeropuerto na nan yegada i na laboratorionan promé ku nan bandoná Aruba. 

E ‘Postivity rate’ entre residente nan di Aruba mes ta 15%, pues ta hopi, mirando ku aki na Kòrsou dòkter Gerstenbluth semper a bisa ku esaki mester ta bou di 10% pa asina bo no hinka bo kapasidat médiko den problema.

Nan tin na Aruba 329 kaso positivo i nan kantidat di morto debí na Corona Vírùs a oumentá na 68. Nan tin 16 persona interná di kual sinku (5) ta den kuido intensivo. Edat promedio di esnan interná den kuido intensivo ta 63 aña.