Riba foto abogadonan mr Terpstra i mr Doekhi huntu ku gerensha di CPR.

Nieuwe Haven,– Korte sivil a dikta den nan veredikto ku CPR ta risibí un deskuento riba hürmentu di tanki entre 16 di mei 2023 pa 15 di yüli 2023.  

E debe habrí na CRU a suma un total di $8.7 mion. Durante e diskushon nan den sala, abogadonan di CPR, mr Terpstra i mr Doekhie, a indiká ku CPR mester risibí un deskuento riba e debe habrí mirando ku diferente di e tankinan no tabata apto pa depositá krudo òf Fuel Oil aden. Segun CPR tankinan 9106, 9119 i 9128 no tabata den estado adekuá. E abogadonan di Murray a splika ku for di 8 di ougùstùs 2022,  e tres tankinan no tabata adekuá, pues CPR ta bini na remarke pa redusí e debe habrí ku $749 mil florin.

Tambe e abogadonan di CPR a splika ku den e periodo di 16 di mei 2023 pa 15 di yüli 2023 tambe a konstatá un imperfekto den 1 dje tankinan, pues den e periodo aki CPR tambe ta bini na remarke pa redusí e debe ku $266 mil.

Riba diskushon pa redusí e debe habrí ku $749 mil, abogadonan di CRU, mr de Vries i mr Drissen, a splika ku CPR a paga tres diferente faktura sin duna reklamo tokante e tanki, pues ta despues di e pagonan e reklamonan a kuminsá subi riba mesa. Tambe e abogadonan di CRU a indiká ku e kaso ta bai tokante fakturanan habrí desde novèmber 2022, pues e diskushon tokante e fakturanan ougùstùs, sèptèmber i òktober 2022 no ta al kaso mas den e wisio sumario aki.

Den e veredikto di e kaso, korte sivil a indiká ku CPR no ta bin na remarke pa redusí e debe ku $749 mil. Segun e veredikto, no por kita e 749 mil dòler di e debe habrí komo ku e 749 mil dòler ya a wòrdu pagá dor di CPR den fakturanan anterior. “Pues mester asumí ku CPR a akordá e fakturanan na momentu ku e fakturanan a wòrdu pagá”, segun e veredikto di hues.

Pa e imperfekto den un dje tankinan den e periodo di 16 di mei 2023 pa 15 di yüli 2023 CPR a pidi un redukshon di $266 mil. E diskushon aki si korte a honra den fabor di e defensa di CPR. Den e veredikto korte a kuestioná den ki grado mester adaptá e preis di hür mirando ku un dje tankinan tabata tin un imperfekto riba dje. Segun dokumentashon, CPR a reklamá asuntunan di e tanki na tempu, pues CPR ta bini na remarke pa redusí e debe habrí ku $266 mil.

Apesar di e redukshon di 266 mil dòler por konstatá ku CRU a gana e disputa di pago den sala di korte. Mirando ku CPR lo mester paga un debe habrí di 7.9 mion dòler pa hür 11 di tanki na Bullenbaai, mas 500 mil dòler pa trabounan hasí dor di CRU ku CPR ta pendiente di paga i por último CPR mester paga 172 mil dòler pa gastunan di depósito den tanki 9099 tur luna entrante 16 di yüli 2023.

Apesar di e debe korte a indiká ku CRU no por bende e 500 mil barí di Fuel Oil di CPR. Aunke e defensa di CRU a indiká ku CRU mester di entrada pa manetenshon di e fasilidatnan i pa paga 250 empleado, korte a rechasá e petishon aki riba 8 di ougùstùs 2023.