Kaso Ennia: ta imposibel konsiderá un fiansa, sin sa kontenido di e tratamentunan, pasobra simplemente Banko Sentral tin beslag riba un kantidat di aktivo

Gorsiraweg– Konforme un proposishon di e komishon instalá pa Minister di Finansas, Javier Silvania, mester krea un fondo di solidaridat. Esaki pa kubri e impakto di riesgo okashoná pa e debakel di Ennia.

Tambe e minister a supliká pa un retraso den fecha di entregá presupuesto estatal, pasobra e.o. mester warda riba desishon di Hulanda, si ta bai finansiá e impakto di Ennia. Tantu e komishon instalá pa Silvania, komo sekretario di estado Alexandra van Huffelen, a keda sin konsiderá e tratamentunan den korte sivil riba Ennia. E komishon, a menshoná esei spesífikamente tambe di a ekskluí demandanan den korte.

Esei por bira un fayo grandi den konsiderashonnan riba e suma ku tantu Silvania komo van Huffelen ta dispuesto pa hasi un fiansa.  Es mas, ta imposibel konsiderá un fiansa, sin sa kontenido di e tratamentunan, pasobra simplemente Banko Sentral tin beslag riba un kantidat di aktivo, kual tei hasi e suma di fiansa ménos di 700 mion. Ya kaba, e Tribunal di Tres Wes den Apelashon a duna indikashon ku e claim lo ta ménos di 1.1 mil mion. Banko Sentral a keda sin menshoná den korte kiko e daño di Ennia lo bira, despues ku nan rekuperá e aktivonan kual korte a aprobá pa imponé beslag. Ta trata di sigur, beslag riba akshon a  den Kirby Corporation, depósitonan kèsh ku tabata riba kuentanan di kas invershonista Meryll Lynch i finalmente tambe posibel benta di Mullet Bay, inkluso The Towers. Anto ainda mester keda determiná si Hushang Ansary a uza aktivonan den bolsa di Ennia pa transferí akshon den Nabors Industries, un otro invershon mas di Grupo Ansary- Parman.