Firma: PDVSA i RdK a firma na desèmber 2023.

Isla—Aparte di un seri di mal notisia rondó di Refineria di Kòrsou i CRU, tòg tin solo na horizonte. OFAC,Ofisina di Kontrolaria Aktivonan Internashonal Estado Unidense entrante 15 di Aprel a o bolbe imponé restrikshonnan pa eksportá produktonan petrolero for di Venezuela. Pero, segun Promé Minister Pik Pisas, e desishon ei no afektá e areglo ku PDVSA.

E notisia ta unu sumamente alentador pa e intenshonnan entre PDVSA i Refineria di Kòrsou. Manera ta konosí, PDVSA debe ainda un suma di 21 mion florin na pagonan di sesantia i kosto di finalisashon na eks empleadonan di e kompania, despues di a bandoná Kòrsou. Na Desèmber último e dos kompanianan a anunsiá un areglo pa PDVSA entrega 45 mion dòler anual.

PDVSA,  den pasado, debí na restrikshonnan di embargo, no a logra kumpli ku un parti di sesantia i finalisashon. Aparte di esei, e kompania a pèrdè sèn na Giro. Un suma di kasi 13 mion florin di Isla BV, ainda no por lòs na Giro, via GSH. E suma ta pegá for di 29 Novèmber 2019 i ta kai bou di areglo unda Giro Settlement Holding tin maneho riba e fondonan komo vehíkulo apuntá pa Gobièrnu di Kòrsou. Esakinan a prevení PDVSA di kumpli.

Na desèmber 2023, e kompania venezolano a primintí di depositá  21 mion florin pa kanselá nan debe atrasá serka eks empleadonan i kontratistanan ku tabata traha riba tereno di Isla. Pero anke esaki tabata un prioridat, e pago no a yega. Minister Charles Cooper, kende tabata e minister tras di kortina den e dil ku PDVSA. Promé Minister Pik Pisas a konfirmá e informashon, despues ku Cooper a biaha ku Patrick Newton pa Venezuela, unda nan a sinta ku PDVSA. Segun Cooper, PDVSA lo paga e 21 mion florin retrasá pero un parti lo bini na produkto pa RdK bende i un parti kisas lo bini na sèn. Segun Pisas, e negosiashonnan ta andando i palabrashon ta pa Yüni próksimo e pago ta tuma lugá.

Lokual tabata prevení e entrega di produkto ta lisensia di OFAC. Esaki entretantu ta reglá i awor ta kestion di warda dia ku PDVSA kuminsá manda produktonan petrolero pa Kòrsou.