Buena Vista,–  E presidente di fundashon Animals are our Friends, Dulce Bonifacio, mester a presentá na Cubaweg pa asina trata na reskatá un kachó kaminda malechornan lo a kab e bestia su pata kita afó.

E dama kende aktualmente ta manehá un santuario di 200 kachó a notifiká ku el a risibí informashon kaminda un kachó di kaya tabata kana dífisil. Mesora Bonifacio a bai den direkshon di CUbaweg pa asina buska e kachó. Dado momentue dama a nota di e kachó ku tabata kana difísil. Den promé instante e sospecho tabata ku un outo lo a dal e kachó, pero na e sitio e dama a nota ku e kachó su pata rèks dilanti a keda di kap. Komo eksperto di  bestia, Dulce Bonifacio a indiká ku un sla di outo no por kousa un leshon asinaki i e pata ta mustra manera el a wòrdu di kap ku un machete òf algu similar.

Na momentu ku Bonifacio tabata trata na duna e kachó kuido médiko, por nota kon e kachó tabata den un strès enorme. Ademas, e kachó tabata purba na bandoná e sitio, pero komo ku e tabata tin un herida grave, e kachó no por a move mashá.

Dado momentu Bonifacio a logra di kaptura e kachó i hink’é den kouchi, pa mesora bai ku e kachó na su santuario. Aktualmente e dama ta tratando na yega na fondo pa asina por finansiá kuido médiko pa e kachó aki.

No ta konosí kon a kap e pata di e kachó kita afó.

Dulce Bonifacio ta presidente di Stichting Animals are our Friends. Aktualmente e fundashon ta manehando un santuario di 200 kachó kaminda e meta prinsipal ta pa yuda bestianan di kaya. E fundashon ta operá sin sosten di gobièrnu, pues konstantemente e fundashon ta trata na buska fondonan privá. Por duna sosten dor di tuma kontakto ku Bonifacio riba 6693844 i por hasi donashon riba e kuenta bankario di Banco di Caribe #33311001