Punda—Ayera durante un rueda di prensa na Fòrti Amsterdam, direktor di Ofisina di Telekomunikashon i Pòst, Curt Belfor a konfirmá ku preis di kombustibel ta bolbe subi.

Manera menshoná i ayera konfirmá pa Belfor, e subida  tin di haber ku e desaroyonan internashonal. Belfor a splika ku entre otro preis di krudo a subi resultando ku tantu Mogas komo Diesel ta subi. Mogas ta subi ku  6 sèn pa liter miéntras diesel ta subi ku 17 sèn. Segun Belfor, den realidat mester a subi e preis di diesel ku 30 sèn, pero esaki lo tabata un oumento demasiado haltu. Belfor a splika ku lo karga e oumento adishonal pa e siguiente periodo. Na e momentonan aki a tene e subida te na 17 sèn.

Lástimamente, oumento di kombustibel ta nifiká oumento den preis di utilidat. Belfor a konfirmá ayera ku pa lokual ta trata utilidat e oumento tabatin su efektonan. Pues kombustibel ta unu di e komponentenan mas importante riba preis di utilidat. E oumento riba koriente ta bira 6 sèn miéntras e efekto riba oumento di pa awa ta bira 41 sèn. Aparte di e oumento den preisnan di kombustibel, tabatin problema ku produkshon di energia via e parkenan di molina. Debí na un bahada fuerte den bientu último tempu, kombiná ku un paro temporal di algun molina, esaki ta okashoná ku e uzo di kombustibel pa produsí utilidat ta oumentá i asina tambe oumentando e preis di utilidat.