Outoridatnan buskando mas prueba.

NIEUWE HAVEN,– Den un sekresiá enorme a logra di saka sospechoso R.V.A for  di SDKK Koraal Specht  i a traslad’é  pa e sentro di detenshon  KIA na Aruba na unda e la wòrdu enkarselá, aparentemente pa su protekshon.

Ya tin algun tempu kaba ku e akusado R..V.A. kende  a keda detené aki na Kòrsou pa su envolvimentu den trafikashon di droga via kònteiner  a ser saká for di Kòrsou i hibá pa Aruba.   Ayera korte a trata e kaso aki den pro firma, kaminda e akusado ta na Aruba i pues a hasi un video conference pa asina por a komuniká kuné. Lokual tabata notabel ayera ta ku niun momento so e akusado no a presentá den pantaya i tampoko a papia un palabra. Pues korte aki na Kòrsou no sa mes si e persona ku nan tabata papia kuné tabata skucha si òf no i ta simplemente mester a kere den e pèrsonal di korte aya na Aruba kaminda un señora a presentá den pantaya i bisa ku tur kos ta kla i ku ta skuchando esnan aki na Kòrsou. Despues ku e sospecho R.V.A a papia (basha bou) ta parse ku tin masha protekshon pa su persona, siendo ku niun ratu so no tabatin ningun menasa kontra dje òf a lo ménos esei no a bini dilanti den korte.

Ta akusá R.V.A. di 54 aña  ku den e periodo  di 1 di ougùstùs 2022  te ku  2 di sèptèmber 2022 su so òf huntu ku otronan sea mester a importá òf eksportá i òf tambe mester a sea prepará, bende, transportá un kargamentu di 819 kilo di kokaina. Tambe e ta wòrdu akusá di hasiendo uso di telefon e lo mester tabatin kontakto i òf interkambiá informashon i òf traha afsprak ku otro ko akusadonan pa sea importashon, eksportashon i òf transportashon di droga. Tambe e ta wòrdu akusá di tabatin kontakto ku regularidat ku bewaker di e haf di Kòrsou pa sea habri un di e portanan di entrada  i òf laga otro personanan  i òf vehíkulonan subi e tereno di pa por yega na e haf di kònteiner. Tambe di tabata duna informashon den kua di e kònteinernan e droga mester wòrdu pone.

Tambe e lo mester a guia un òf mas ko akusado riba e tereno di haf pa asina por a yega na e kònteinernan. Otro akusashon ta ku den e periodo di 1 di novèmber 2020 pa 31 yanüari 2021na Kòrsou i òf St Maarten i òf Jamaica i òf Fransia e huntu ku otronan mester a violá e lei di droga. Esaki ta enserá ku durante di e periodo di 1 novèmber 2020 pa 18 yanüari 2021 lo mester a sea prepará, bende, importá òf transportá un kargamentu di 140 kilo di koka. Tambe ku den e periodo di 1 desèmber 2020 te ku 18 yanüari 2021 lo a yuda den un transporte di 172 kilo mas 600 gram di koka. Ta trata aki di transportenan di droga ku a ser hasi den kònteiner yena ku piedra rumbo pa Hulanda pero a keda interseptá.