Punda—Miembro di Parlamento Elsa Rozendal a entrega retiro serka MAN. Rozendal a tuma retiro sin bai ku asiento.

Komunikado di Elsa Rozendal:

Tempu diferente ta eksigí un aserkamentu diferente

E retonan ku nos ta konfrontando komo pais, dia pa dia, ta birando mas grandi i kompleho.  Esaki ta eksigí pa kada un di nos duna mas ku nos a bin ta duna te ku awor i tambe tin e kurashi pa kana un kaminda ku realmente ta sirbi nos komunidat i saka nos for di e situashon difísil i kompliká ku nos ta den na e momentunan aki.

Awe mi ke informá boso ku mi a tuma e desishon pa no sigui ku MAN i kuminsá eksplorá otro alternativanan pa sigui sirbi nos komunidat. Awe mainta den un karta pa direktiva di MAN, mi a informá partido di mi desishon. Tambe mi a pone e asiento ku aktualmente mi ta okupando den Parlamento na disposishon di partido. Asina MAN por sigui sostené e koalishon aktual.

Mi ta gradisí partido MAN pa e oportunidat ku e a dunami. Pueblo por konta ku mi ta bai sigui duna mi kontribushon na bienestar di nos komunidat. Lo mi tuma e dianan di fiesta aki pa reflehá riba kon lo mi bai sigui duna mi kontribushon i sosten na yuda saka nos komunidat for di e situashon difísil i kompliká aki.

Mi ke pidi mi sostenedó nan, simpatisante nan, amigunan, konosínan i boso tur ku ta siguimi, un tiki pasenshi, despues di e dianan di fiesta lo mi informá boso kiko mi siguiente pasonan lo bai ta. Un danki di kurason pa boso sosten durante e último añanan. Mi ta stima boso

Elsa Rozendal