Mullet Bay; un ruina di hotel, ku desaroyonan di preis haltu riba merkado na tur proyekto bisiña.

Nieuwe Haven— E strategia di Ennia Caribe Holding, pa salta un veredikto intermediario na Korte di Apelashon pa mesora sigui pa un Tribunal Supremo, ta un desishon lógiko. Na promé liga Ennia ta pronostiká ku e kaso lo yega e Tribunal Supremo tòg, despues di apelashon, miéntras desaroyonan di tereno rondó di Mullet Bay ta indiká ku e terenonan por tin e balor apuntá pa grupo Ansary.

Segun Hushang Ansary, Ralph Palm i Abdallah Andraous, e balotashon di Mullet Bay ta korekto. Esaki ta lokual nan a bini ta apuntá den korte miéntras abogadonan di Ennia Caribe Holding/CBCS ta pensa ku grupo Ansary a eksagerá e balor pa por saka mas sen for di Ennia. Desaroyonan aktual, rondó di Mullet Bay ta mustrando otro. Un kondominio na The Fourteen di 100 meter kuadra ta wòrdu bendí pa 1.1 mion florin (550 mil dòler).  Esaki ta igual na 10 mil florin (nafl. 10.000,=) pa meter kuadra di konstrukshon. Si apliká un regla komun unda por derivá e relashon entre meter kuadrá konstruí na balor di tereno, Mullet Bay en bèrdat por tin un preis na merkado di por lo ménos mil florin (Nafl. 1.000,-) pa meter kuadra. Esaki ta duna un balor aserka di e terenonan so, sin konstrukshon na Mullet di entre 670 pa 780 mion florin. I ta netamente rònt dje balornan aki, Ansary su kálkulonan tabata sali. Penshonadonan di Ennia ta dependé di e balor ku sali for di Mullet Bay. The Fourteen ta un proyekto di kondominio,  apénas 50 meter for di terenonan na Mullet Bay.

Manera ta konosí, e Tribunal di Tres hues den Apelashon, a duna órden pa partidonan yega na un balotashon di Mullet Bay, pa Korte di Hustisia por averiguá si un suma di kasi 700 mion florin di sakeo for di Ennia ta responsabilisá. For di 2002 te ku 2021, tabatin por lo ménos 13 kalkulo riba e balor di Mullet Bay. Mullet Bay ta balorá aktualmente segun Parman International na 770 mion florin miéntras segun Banko Sentral, e balor di Mullet Bay no ta surpasá 90 mion florin. Un diskrepansha enorme entre e dos partidonan. E balor ta importante, pasobra esaki ta anotá komo aktivo serka EC Investment, kende a uza entre otro e balor aktivá di Mullet Bay pa por responsabilisá invershon via di Ennia Caribe Leven pa bolsa internashonal di balor. Den bukinan di Ennia, ta papiando di 770 mion florin.   Pues 770 mion florin a sirbi ku un tipo di “collateral” pa EC Investment por a uza sèn di Ennia Caribe manda pa Parman International B.V. por a uza riba bolsa di balor estado unidense.  770 mion kita 90 mion ta un diferensha grandi di 680 mion florin. Segun Parman International , nan ta asombrá ku awor Banko Sentral ta kuestioná e balor di Mullet Bay, miéntras Banko Sentral mes a permití Ennia Caribe kobra dividendo basá riba e preisnan di tereno relatá na 770 mion florin.