Punda—Segun Eugene Rhuggenaath ayera den un splikashon general na Pueblo di Kòrsou, mester kuminsá sinti efektonan di e firmamentu ku Hulanda pa finalnan di Yanüari. Aparte di sinti e efektonan dirèkt, e presupuesto di Kòrsou tambe lo wòrdu aliviá pendiente un firmamentu definitivo di COHO.

Entre otro, un suma di 82 mion florin ku Kòrsou mester paga pa 2020, lo wòrdu transformá den un fiansa di 15 aña sin interes miéntras tambe a bini 286 mion florin adishonal na Novèmber  pa finansiá e di tres tranche den programa di NOW i Fondonan di Sosten. Esaki ta lokual por konkluí den un kalkulashon di CFT.  15 di òktober último, Kòrsou mester a paga Hulanda bek un suma di 82 mion florin. Ta trata di un fiansa pistolero kual e suma mester wòrdu pagá bek den un pago. Segun Knops , ta bai transformá e fiansa aki den un fiansa den 15 aña sin interes. Orígen di e fiansa no ta konosí pero na 10-10-10, Hulanda e Kòrsou a kumbiní pa transformá un suma di 1.7 miar florin den obligashon kual 100 mion mester paga na 2020. Aparte di e 82 mion florin, Hulanda a bai aprobá 286 mion den kuadro di e fondo di sosten.  Ta keda den diskushon ainda den ki forma e sosten di likides ta bai tuma lugá. Segun rapòrtnan di Cft tabatin mester un suma di kasi 590 mion florin adishonal. Di e suma aki Hulanda a manda 286 mion florin, lokual kisas ta indikativo ku falta 304 mion florin pa e promé kuartal di 2021.