Punda– Tres organisashon, Foundation Tri-Curaçao & PC Racing i Ronald McDonald House Charities Curaçao Foundation (RMHC), a uni pa ofresé un kareda di resistensia eksitante i inkreibel, durante kua abo lo purba akumulá kilometer pa un bon kousa.

Partisipando den e evento úniko aki, bo ta duna bèk na un bon kousa den RMHC, miéntras bo ta logra un meta personal desafiante! Lo bo tin hinter aña 2021 pa kompletá e kilometernan koriendo òf kanando.  E evento ta diseñá ku henter Kòrsou na mente. E distansianan disponibel ta: 1000 mia (1600 kilometer) pa aña pa e koredónan mas eksperto òf 1000 kilometer òf 500 kilometer pa aña ku por logra koriendo òf kanando, loke bo ta deseá.

Tur ku logra kaba, lo risibí un T-shirt i un plaka konmemorativo komo muestra di e logro. Tur ku tin e edat di 18 aña òf mas por inskribí i gastu di inskripshon ta ANG 75 pa 1600 i 1000 km i ANG 50 pa 500 km. Tur loke mester hasi pa partisipá ta inskribí usando e kódigo QR aki i sigui e instrukshonnan.

Despues registrá bo prestashon personal usando  Garmin, Strava òf otro òf ‘electronic data source’ similar. Na fin di kada luna bo mester manda bo resultadonan di luna pa medio di un ‘screenshot’ pa e komishon organisadó.

Lo presentá medaya di grupo di edat tambe na e promé 3 partisipantenan ku kompletá e distansia ku nan a selektá! Por registrá te fin di mart 2021. Tur hende ta bon biní pa partisipá! Pa mas informashon, por tuma kontakto ku: Foundation Tri-Curaçao & PC Racing via di nan Email: [email protected] of  RMHC Curaçao claudia.rigaud@rmhc-curaçao.org .