WILLEMSTAD,—-Por bisa libramente ku farándula lokal a habri aña riba un bon pia, kaminda ku ya for di djamars tras di lomba, tabatin un evento ku a hala bastante atenshon.

Miéntras tantu Vigilante Farándula a keda informá ku durante di e di tres siman di luna di mart próksimo, agrupashon musikal “GIO The Legends”, lo ta na Hulanda pa un presentashon. Nan lo bai ta ku tur e músikonan ku tabata forma parti di agrupashon musikal GIO Fuertisimo, unda ku nan lo konta ku e front formá pa e kuater kantantenan, kende ta  Clarck “Yuyu” Zalm, Roald Balentien, ‘DjuDju-V.’ i “Rasta Lè”.

No ta un sekreto ku agrupashon musikal GIO, tin hopi fanátiko na Hulanda i ku e kuater kantantenan ta dòrná ku fanátiko. Esaki ta pone ku e atenshon pa ku e presentashon di GIO riba e lugá, sigur lo bai bòltu e sitio kaminda ku e banda ta bai presentá.

Te na e momentunan aki, ta agrupashon musikal “GIO The Legends”, ta e promé banda di ritmo kombiná ku lo bai ta na Hulanda durante di e promé tres lunanan di aña 2023. E banda lo bai ta riba e lugá, nèt un luna despues di temporada di karnaval di Kòrsou. Ta asina ku e dia 21 di febrüari próksimo, ta marcha di despedida i dia 25 di febrüari ta dia ku ta bai entregá premio na e ganadónan.