E grupo aki ta asosiá na e grupo mundial i kada aña ta organisá un aktividat pa rekoudá fondo pa nesesidatnan den nos komunidat. Dor di e pandemia di Covid, Copernicia no por a hasi masha, último 3 añanan aki, pero a aña aki a bini ku nan proyekto den kual a rekoré e diferente paisnan den nos bisindario. Asina tabata tin presentashon di India, Estádos Unídos, Cuba, Haiti, Argentina,  México, Repúblika Dominikana, Brasil, Sürnam, Perú, Spaña, Venezuela, Bonaire i klaro terminando na Kòrsou.

E show a tuma lugá den forma di un biahe ku a lanta for di Kòrsou i kaminda kada pais ku a bishita, un representante tabata duna algu di e pais konserní. Copernicia ta hopi kontentu ku e presentashon tabata “sold out” i ku tur presente a gosa di un show tur afó. Pastor Raul tambe a hasi akto di presensia i a hasi un orashon pa asina pidi todopoderoso bendishon i tambe a resa pa pas na mundu ya ku mas ku nunka nos mester di esaki den e tèmpo ku nos ta biba.

Presentenan a haña kos di kome i bebe i tambe a rifa diferente premio. E “centre piece” , tabata algu masha bunita ku bandera nan di tur e paisnan ku a partisipá. E satisfakshon mas grandi ku Copernicia tin ta ku, e trabou duru ku nan a hasi a duna fruta ya ku e organisashon mester a superá diferente estorbo pa garantisá  ku e show a sigui. E echo ku tur karchi a kaba, ta algu ku Copernicia ta super kontentu.

Tambe e organisashon ke yama danki na TUR e instansianan ku a koperá pa asina hasi e presentashon algu bunita ku a kai na satisfakshon di un i tur. Diferente di e artistanan ku a presentá ta nos yunan di tera, kende a demostrá un abilidat grandi pa presentá e kultura di un otro pais.  Copernicia sigur lo evaluá e presentashon i ta spera ku otro aña lo por bolbe bini ku algu ku lo kai na agrado di tur ku lo bishita nan evento. Manera ya indiká e rekoudashon neto lo bai den proyekto sosial pa nos komunidat.