George Hernandez, CGTC ta kulpa Banko Sentral tambe

Veeris—Segun Sekretario General di CGTC, George Hernandez, no ta gobièrnu so mester hasi esfuerso pa drecha e solbabilidat di Ennia Caribe Holding, sino Banko Sentral tambe.

E sekretario general djamars último a krítika Banko Sentral  di a hiba un mal supervishon riba Ennia. “Nan tambe mester yuda den e problema segun Hernandez. Segun Hernandez Banko Sentral ta esun responsabel pa e debakel di Ennia i mester aportá, den forma finansiero na Ennia i mantené e solbabilidat di e kompania di seguro. E reakshon di Hernandez a bini durante un anunsio di aliansa entre SSK, CGTC, sindikato CBV, STS, CBV i Usibu di Boneiru huntu ku ASPEN, e asosashon di penshonadonan Ennia, ASPEN.

Banko Sentral di nan parti ta kombensí di tin un kaso den korte. E instituto estatal di maneho monetario a mantené tur embargo riba propiedatnan di Ansary relashon ku Ennia i ta ehekutando. Segun Jardim e veredikto di korte den promé instansha alabes ta duna espasio pa pèrsigui tambe esnan indirektamente envolví den e daño okashoná. Ku esaki, Jardim tabata referí na komisariadonan ku durante e periodo di e “sakeo” tabata envolví den e desishonnan. Manera ta konosí, den su kontenido, wes Eveline Nootenboom a lista nòmbernan di tur e komisariadonan kende a risibi sèn pa nan envolvimentu. Aparte di e komisariadonan tin chèns ku tur esnan kende a risibi sèn for di Ennia Caribe sin tabatin un base konforme bon maneho tambe por wòrdu pèrsigui den e proseso di kobransa.