WILLEMSTAD – Un estudio resiente hasí bou di mei mion adulto na Merka, a mustra un konekshon entre uso di cannabis (marihuana òf pitu) i un riesgo mas haltu di problema di kurason i problemanan vaskular, ku ta kousa atakenan di entre otro kurason i serebro. Ku e legalisashon di cannabis na 24 estado na Estádonan Uní, e uzo di esaki a subi rápidamente. Pero e investigashon nobo akí ta duna un punto di bista nobo tokante e riesgonan posibel ku ta kana man den man ku konsumo di cannabis, ku hopi hende no tabata konsiente di. Na Kòrsou mes tambe e uso di marihuana ta haltu, pero poko ta konsiente di e riesgonan.

Abra Jeffers, kende ta traha na Massachusetts General Hospital na Boston, ta enfatisá e falta di konosementu tokante e riesgonan di salú di uzo di cannabis, spesífikamente riba tereno di problema di kurason i ardu. No opstante investigashonnan anterior ku a señalá un konekshon entre cannabis i malesa kardíako, e konsientisashon tokante e asuntu akí ta bahando, segun Jeffers. E estudio, ehekutá pa Centers for Disease Control and Prevention di Estádonan Uní, a analisá datonan di 430 mil adulto merikano. E estudio a enfoká spesífikamente riba e relashon entre konsumo di cannabis raportá i problema di kurason i ardu. E resultadonan, publiká den Journal of The American Heart Association, ta mustra un koneshon signifikante entre konsumo di cannabis i diferente problema di kurason i ardu, manera malesa kardíako, atake di kurason i otro tiponan di atake.

Loke ta interesante ta ku e konekshon aki ta keda firme, asta si saka otro faktornan afó manera huma sigaria, “vape”, uzo di alkòhòl, diabétis òf obesidat. Tantu usadónan di cannabis ku ta us’é tur dia, komo esnan ku no ta us’é tur dia, a mustra un riesgo mas haltu pa atake di kurason kompará ku esnan ku no ta us’é. Esnan ku ta us’é tur dia, ademas tabatin 25% mas chèns di keda sufri di un atake di kurason i 42% mas chèns di sufri otro tipo di atake, manera serebral. Un faktor interesante ta ku bou di adultonan mas hóben (hòmbrenan bou di 55 i muhénan bou di 65 aña) a asosiá uzo di cannabis ku un 36% mas haltu di riesgonan kombiná di malesanan kardíako koronario, atake di kurason i serebrovaskular.

Loke ta hasi e estudio aki mas relevante ta ku e ta enfoká riba adultonan ku nunka tabata huma sigaria òf uza sigaria elektróniko. Segun Jeffers, por kompará huma di cannabis ku huma di tabako i e ta trese e mésun riesgonan kardíako. E resultadonan akí ta di importansia spesial si tene kuenta ku e disminushon di uzo di tabako tradishonal i e oumento di konsumo di cannabis. E estudio ta enfatisá e nesesidat di mas edukashon tokante e riesgonan potensial di uzo di cannabis, spesífikamente riba tereno di problema di kurason i vaskular. Ounke ta aseptá cannabis mas i mas i ta legalisá esaki, ta esensial ku esnan ku ta usa esaki ta konsiente di e posibel konsekuensianan pa nan salú. Ku e konosementu for di e estudio akí, legisladónan i instansianan di salubridat por desaroyá kampañanan di konsientisashon mas efektivo pa informá i protegé nan pueblo kontra e peligernan di konsumo di cannabis eksesivamente.