ROTTERDAM—Segun Seguridat belga maritimo (CMB) a señalá barkunan no-militar den Noordzee den ultimo 6 luna, ku posiblemente ta envolví den spionahe.

Asina e organo di gobièrnu a informá media bèlga. Den Hulanda tambe tin sospechonan fuerte. Segun CMB sigur 5 barku di karga òf di piskadónan di kua ta sospechá di spionahe. E bosero no a menshoná kua paisnan. CMB a konkluí ku ta difisíl pa determiná ku un barku tin dòbel funshon. Esaki pasobra apenas tin barkunan militar ku ta fungi pa spionahe.

Pa basta tempu tin relatonan di barkunan spionahe den Oropa. Un bon ehèmpel ta e barku peskera ruso Taurus ku segun Finlandia a drenta haf noruega, pero ku solamente 34 biaha tabatin piska na bordo. Tambe varios biaha a detekta barkunan ku a pone riba mapa e infrastruktura di fondo di laman i tin informenan di barkunan ku a traha mapanan ku informashon di pipanan di gas i kabelnan di internet. Periodistanan di Dinamarka, Suisa, Noruega i Finlanda huntu a traha un documental di e desaroyonan. Den Hulanda tambe tin spekulashonnan di barkunan spion dilanti kosta i den hafnan, segun programa di investigashon Pointer. Asina e kompania peskera ruso Norebo ta drenta haf Eemshaven na Groningen kada dos siman ku piska di fris. Pero ta hustamente e kompania aki ku varios biaha a keda detektá na Merka banda di supmarinonan, sin ningun motibo balido. E barkunan di Norebo den Hulanda ta mara banda di teritorio militar. Tambe tin puntonan di infrastruktura den area, inkluso pipanan di gas i parkenan di mulina di bientu. Norebo no kier a reakshoná riba e alegashonnan. Servisio di inteligensia i seguridat militar MIVD a konkluí den su relato annual 2023 ku e menasa di spionahe ruso ta aktual. Hulanda ta keda un blanku di spionahe pasobra e ta duna sosten na Ukraina. Ademas, Hulanda ta interesante pa su transborde di material militar. Den 2023 a desvia un barku ruso den Noordzee ku tabata purba buska informashon di parkenan di mulina di bientu. Maske MIVD no kier duna komentario riba Norebo, e servisio a splika ku ta hasi investigashon riba spionahe ruso i sabotahe riba laman.