WILLEMSTAD – Komishon Sentral di Parlamento a risibí un asina yamá “Technische Briefing” di Stichting Unie Trustkantoor Curaçao tokante e posibel efektonan di e lei nobo yamá “Landsverordening op de Kansspelen” (LOK), ku ta regulá weganan di azar.

Despues di e presentashon ku a tuma lugá djaluna último, miembronan di Parlamento a haña e oportunidat pa hasi pregunta. Vise-Presidente di Parlamento Corinne Djaoen-Genaro a skòrs e reunion te un próksimo aviso, pa duna Stichting Unie Trustkantoor Curaçao e espasio pa formulá e kontestanan hasí durante nan 10 minüt di palabra den e úniko tanda dje reunion.

A pone e tópiko riba agènda pa kumpli ku petishon di dia 25 di sèptèmber último di Komishon di Finansa. E komishon fiho di Finansa di Parlamento a reuní anteriormene ku e fundashon. Durante e reunion tra’i porta será akí, e fundashon a trese nan punto di bista dilanti kaba tokante e posibel efektonan dje LOK, ku ta regla weganan di azar. E fundashon a duna un presentashon di loke den su bista ta e efektonan negativo dje LOK. E komishon a proponé despues pa duna e fundashon e posibilidat pa trese su puntonan doloroso tokante e LOK públikamente dilanti durante un reunion di Komishon Sentral, pa medio di un ‘technische briefing’ (informe tékniko).

Durante e reunion den Komishon Sentral, e fundashon a para ketu na entre otro e daño ku ya e konsepto di LOK ta okashonando na e sektor di wega di plaka digital di Kòrsou. Segun e fundashon, tin mas di 300 empleado trahando den e sektor akí, ku salarionan ku ta varia di klase medio pa salario altu. Nan ta paga impuesto riba entrada, preminan sosial, hipotek i fiansanan di outo. I e sektor ta un posibilidat di trabou (in)direkto pa abogadonan, akòuntentnan, notarionan, fiskalistanan i ofisinanan di trùst. E sektor ta generá divisa i entrada di impuesto pa Kòrsou. Benta di lisensia pa wega di plaka digital ta tuma lugá dor di Kòrsou na operadónan stranhero. Kemen e lei tin un efekto sosial-ekonómiko hopi grandi pa Kòrsou.

Representante di e fundashon a trese dilanti tambe e puntonan doloroso dje konsepto di lei. A menshoná eksigensianan di ‘substance’ mas altu (mester hür ofisina i mester sòru pa tin un persona klave), e ‘license fee’ ku ta hopi altu, e ròl di ofisinanan di trùst ku ta bira hopi chikí, e echo ku ta saka e asina yamá ‘master license houders’ (MLH) for di wega i ku Gaming Control Board (GCB) lo remplasá nan. Segun e fundashon, e konsekuensia di tur esaki ta ku operadónan ta bai otro pais (hurisdikshon). Lo bai tin pèrdida di (oportunidat pa) trabou serka e MLH-nan, ofisinanan di trùst, notarionan, akòuntentnan i fiskalistanan. E konsekuensianan ekonómiko makro ta ku e trahadónan lo no por paga nan hipotek i otro fiansanan bèk, lo tin ménos kontribushon na ekonomia lokal i lo tin ménos entrada di divisa pa Kòrsou. Tambe lo tin entradanan negativo pa kaha di gobièrnu. Segun e fundashon: “Importante ta ku e daño menshoná den e sektor ya ta andando kaba, promé ku e LOK mes ta legalmente implementá.”