Back to Top
Responsive image
E korant di pueblo

Kachó por yuda detektá kaso di Covid-19 na aeropuerto


May 26, 2021 • 3 minüt pa lesa

Dr. Clair Guest huntu ku algun kachó ku a wòrdu di trein pa detektá enfermedat

PUNDA- Universidatnan na Inglatera ta publiká resultado di efektividat di kachó pa detektá personanan infektá pa Covid-19. Investigashon kondusí dor di London School of Hygiene & Tropical Medicine huntu ku University of Durham ta prueba ku kachó por detektá 88% di kasonan positivo pa Covid-19 den un par di sekònde. Esaki ta pone ku e método pa usa kachó pa detektá Covid-19 lo ta unu benefisioso pa screen aeropuerto i eventonan masal.

Kachó médiko usá pa detektá coronavírus na aeropuerto di Helsinki komo parti di ensayo

Segun sientífikonan, kachó entrená pa kasonan médiko, por kontribuí na prevenshon i detekshon di e vírus di Covid-19. Den un ensayo ku a keda hasí, e asina yama kachónan médiko aki a keda entrená pa rekonosé personanan ku ta infektá ku e vírus di Covid-19. A trein e kachónan pa buska i rekonosé un holó distinto ku ta keda produsí dor di personanan ku ta positivo pa Covid-19, un holó inalkansabel pa e nanishi humano.

Kachó tin e abilidat di hole 100.000 bia mas mihó ku e kapasidat ku hende tin pa hole. I ya pa hopi tempu kaba ta uza kachó pa detektá holó, por ehèmpel di droga òf eksplosivonan. Investigashonnan resien ta mustra ku kachó, spesialmente di rasa spaniel i retrievers, por detektá holónan úniko i distinto di malesanan manera kanser, parkinson i malaria.

Kachó médiko durante treining pa rekonosé i detektá e vírus di Covid-19

Seis (6) kachó a keda selektá pa investigá e abilidat pa detektá Covid-19. E método ku a usa pa trein e kachónan ta pa laga nan hole meña, tapaboka i paña di personanan infektá pa e vírus. Tambe a laga e kachónan aki hole e mesun artíkulonan pa personanan ku ta ferkout ya asina nan por distinguí e dos enfermedatnan aki for di otro. A dura un total di dies (10) siman pa trein e kachónan.

Durante e ensayonan a mira ku e kachónan a rekonosé 88% di kasonan positivo di Covid-19.

Tambe e kachónan a logra detektá infekshon ku Covid-19 kousá pa diferente variante di e vírus i kasonan di infekshon sin síntoma.

Kada kachó ta reakshoná diferente despues di a detektá e vírus, algun ta hasi zonido i otronan ta keda para ketu dilanti di e muestra infektá

Resultado di e investigashon aki por ta útil pa detektá kasonan di infekshon na aeropuerto òf eventonan grandi.

Direktor sientífiko di uso di kachó pa detekshon médiko, Claire Guest, a duna di konosé ku e resultadonan di e investigashon ku a keda hasí ta aun mas prueba ku uso di kachó pa detekshon di malesa ta un di e métodonan mas konfiabel pa hasi esaki. E resultado di 88% ta nifiká ku pa kada shen (100) kaso di Covid-19, e kachónan a keda sin rekonosé solamente diesdos (12). Pues si un avion ku tresshen (300) pasahero tin persona infektá na bordo, probablemente e kachónan lo detektá esaki. Un punto negativo ta ku e kachónan lo apuntá 16% di kaso inkorekto, pues kuarentiocho (48) di e tresshen (300) pasaheronan lo wòrdu diagnostiká komo positivo pa Covid-19 sin esaki ta e kaso.

Esaki ta nifiká ku e método di kachó lo pèrdè un porshon di infekshon i alabes lo indiká algun persona positivo inkorektamente. Si kompará e efektividat di e resultadonan di e investigashon ku esnan di PCR-test, esun di PCR ta muchu mas efektivo.

Sientífikonan ta di opinion ku e método di kachó ta unu ku por keda usá komo un hermènt adishonal pa detekshon di Covid-19 huntu ku esnan aktual. E kombinashon di screening pa kachó i un PCR-tèst por detektá 91% di kasonan di Covid-19. Sinembargo, e bentaha mas grandi ku e método di kachó ta trese kuné ta velosidat. Tèstnan di Covid-19 por dura un mínimo di 15 min pa yega na un resultado. Dos (2) kachó por screen tresshen (300) persona den mei ora, esaki segun sientífikonan di e investigashon.

https://amp.theguardian.com/world/2021/may/24/faster-than-pcr-test-dogs-detect-covid-coronavirus-london-bmj#aoh=16222843209836&referrer=https%3A%2F%2Fwww.google.com&amp_tf=From%20%251%24s

Den teoria, hende por keda eksaminá miéntras nan ta para den rei pa drenta avion òf bai un evento. E personanan ku keda selektá pa e kachónan lo mester hasi un tèst adishonal di PCR pa konfirmá e infekshon.

Sientífikonan internashonal ta mira hopi potenshal den e método aki, pero mester tene na kuenta ku e investigashon aun ta den su komienso. Pues ainda e resultadonan mester keda revisá dor di otro sientífikonan promé ku e artíkulo keda públiká internashonalmente i aprobá pa uso riba personanan infektá.

Login