WILLEMSTAD – Un dama bibá na Hulanda a hiba un hòmber dilanti Korte, eksigiendo daño perhuisio, pasó el a dal e den su wowo na 2011.

Korte di Promé Instansia ya a pone e hòmber responsabel pa e daño na 2014 i a konden’é na pago di daño perhuisio. E kaso a bai te Kasashon bin bèk i djamars último Korte den Apelashon a disidí ku e muhé mester risibí kasi 47 mil euro na daño perhuisio.

E kaso akí tabata entamá pa determiná e kantidat di plaka ku e hòmber mester paga na daño perhuisio. Den Korte di Promé Instansia hues a rechasá un gran parti dje kantidat di plaka demandá i e muhé a apelá e desishon. Korte den Apelashon a dikta na aprel di aña pasá ku e hòmber mester paga algun suma adishonal, pero gran parti di loke e muhé a demandá a keda rechasá. P’e motibu ei el a bai den Kasashon kontra e sentensia di hof i e huesnan di Hulanda a destruí e sentensia di hof i a manda e kaso bèk pa un segundo tratamentu den apelashon.

Despues ku Kasashon a manda e kaso bèk pa Korte den Apelashon, mester a tuma desishonnan nobo riba e kantidat di plaka ku e hòmber mester paga na daño perhuisio. Hof a tene kuenta ku diferente aspekto den e kaso akí, manera e motibu i gravedat dje herida na wowo dje muhé, e pèrdida di plaka pa motibu dje insidente, plaka usá pa yudansa doméstiko, i diferente otro tipo di gastu. Hof a determiná ku e daño na e wowo ta permanente, e muhé ta mira dòbel, e tin problema ku bista, problema ku mira profundidat i tambe e tin problema ku konsentrashon. Korte den Apelashon a kalkulá e e pèrdida di plaka sufrí pa motibu dje insidente na 40 mil euro.

Ademas Korte a ordená e hòmber pa paga 1.190 euro na ‘mantelzorg’ i yudansa doméstiko. ‘Mantelzorg’ ta e kuido informal i hopi biaha pa tempu largu di un miembro di famia òf amistatnan malu di salú. E hòmber mester paga otro gastunan tambe, manera entre otro di lèsnan ku e muhé no por a sigui mas pa motibu dje daño na su wowo. Na total e hòmber lo mester paga eksaktamente 46.704,10 florin, plùs interes legal kontando for di 17 di mart 2016. Ademas e mester kubri tur gastu legal mará na e prosedura di algun aña kaba di Korte for di Promé Instansia (7.340 florin total), te Kasashon i bin bèk Korte den Apelashon (15.455,73 florin total). Ta trata akí gastunan di prosedura i tambe di abogado.