Presidente di Parlamento Charetti America-Francisca.

WILLEMSTAD – Entretantu Presidente di Parlamento Charetti America-Francisca a konvoká un reunion pa Parlamento mester risibí kontesta riba preguntanan tokante entre otro e státus di benta di edifisionan monumental di Fundashon Kas Popular (FKP) den área di Rif i e eventual embolbimentu di ko-fundadó di MFK Rudney Garmes i su kompania Hospitality Development & More BV (HD&M). Si tur kos sigui segun plan, gobièrnu lo duna kontesta aki riba 13 di novèmber próksimo. E reunion públiko ta planiá pa start 9’or di mainta.

Parlamento a deliberá dia 19 di òktober último ku Minister di Tráfiko, Transporte i Planifikashon Urbano (VVRP) Charles Cooper i gerensia di FKP tokante desaroyonan preokupante na fundashon. Na kuminsamentu di e reunion Parlamento a bai di akuerdo ku e proposishon di òrdu pa minister di Desaroyo Sosial, Labor i Bienestar (SOAW) Ruthmilda Larmonie-Cecilia, presentá den Parlamento pa duna splikashon riba preguntanan di miembronan di Parlamento relashoná ku e parti sosial, manera entre otro supsidio pa kas. Despues di a skòrs e reunion pa algun ratu, minister Larmonie-Cecilia a presentá den sala di Parlamento. Seguidamente a sigui ku e promé tanda di pregunta.

Tambe a hasi pregunta tokante e benta di edifisionan monumental di FKP den área di Rif i sigur e eventual embolbimentu di e kompania HD&M dje ko-fundadó di MFK Rudney Garmes. Aña pasá direktor di FKP Arthur Con no por a kontestá pregunta tokante benta dje edifisionan abitá akí alegando ku tabata muchu prematuro pa esaki. E proyekto ku a mustra di lo halsa e bista di Otrobanda, a bira un pesadia pa speshalmente e abitantenan di Otrobanda, pero tambe di otro barionan kaminda FKP tin edifisionan/kasnan propio òf ta operá.

Konforme un kontrakt ku Garmes a firma na nòmber di su kompania ku direktor di FKP Con, HD&M tin promé opshon pa kumpra tur propiedat ku FKP ke bende. Alabes tur propiedat mester ta vakante, sino ta hasi nan vakante. E klousula akí den e kontrakt ta loke ta hasi tur kos peligroso pa pueblo. Con di FKP a ripití den media aña pasá for di dia ku Vigilante a publiká e promé relato tokante e intenshon di relashon komersial aki entre HD&M i FKP, ku no ta e intenshon pa bende kasnan di pueblo abitá.

E ophetivo prinispal di FKP ta pa drecha bibienda na Kòrsou kumprando òf desaroyando nan, meskos tambe manehando bibienda adekuá pa pueblo. E portofolio di FKP ta inkluí kasnan nobo i tambe monumentunan. I a base di análisisnan anterior dje portofolio i pa tambe drecha e posishon finansiero di FKP, a disidí ku FKP lo por hasi su portofolio mas efektivo i focus riba konstrukshon nobo i eksistente di kas, loke ta pèrmití un preis di hür ku ta kubri tur gastu. Esaki e kontrakt ta bisa.

Konforme e kontrakt FKP ke deshasí di tur propiedat ku ta rekerí gastunan di kapital ku no por rekuperá di dje, manera ta aktualmente ku edifisionan históriko i monumental. Tur hende ta wak e dil aki ku wowo di falki. Parlamento sigur. A duna Minister Cooper i Minister Larmonie-Cecilia espasio pa formulá e kontestanan riba e preguntanan hasí den promé tanda i aki dos siman ta reanudá e reunion, den kua nan lo duna e kontestanan i miembronan di Parlamento lo hasi pregunta den e segundo tanda.