Materialnan di skol mester wòrdu evaluá di nobo i mester publiká un dekreto nobo pa esaki.

Nieuwe Haven,– For di e veredikto kaminda VPCO a entamá un wisio sumario kontra di ministerio di enseñansa korte a dikta ku ministerio di enseñansa mester adaptá e dekretonan ku ta trata gastunan di material.

VPCO pa tempunan largu ta hibando gobièrnu dilanti pa inhustisia den kompensashon pa duna edukashon na nivel. Ta asina ku un veredikto na febrüari ya kaba a determiná ku gobièrnu mester paga e direktiva di VPCO, 2.2 mion florin pa aña eskolar 2023/2024. Pero ámbos partido, gobièrnu i VPCO, a apelá e kondena aki,  kaminda entretantu Korte Superior a skòrs ehekushon dje sentensia.

Atrobe ámbos partido tabata dilanti korte debí ku atrobe VPCO ta proseder kontra di gobièrnu kontra di inhustisia den e sektor di edukashon. E tratamentu a finalisá ku korte a determiná ku VPCO ta risibiendo muchu tiki na kompensashon pa paga gastunan di material. E gastunan ku ta inkluí nesesidatnan básiko, manera materialnan i métodonan di lès, awa i koriente, limpiesa, ICT (remplasá ekiponan, lisensianan) i trabounan grandi di mantenshon a oumentá atraves di aña i esaki gobièrnu no a tene kuenta kuné.

Relashoná ku e desishon di korte sivil, kaminda gobièrnu lo mester bai paga e gastunan adishonal, korte a determiná ku Pa e añanan eskolar 2019/2020 te ku 2022/2023, Minister mester emití dekretonan di adelanto nobo pa loke ta trata gastunan material. No ta tarea di Korte, sino di Minister, pa determiná kiko ta un kompensashon sufisiente ku mira riba un bon dunamentu di enseñansa. Minister sí mester hasié tumando na kuenta e sentensia aki. I rasonabelmente, Minister lo mester involukrá en todo kaso tambe e direktivanan di skol i SOAB den e proseso di determiná kiko ta un kompensashon sufisiente.

Ademas, lo enkargá Minister ku e tarea di emití un dekreto nobo den kua e mester determiná pa e añanan eskolar 2009/2010 te ku 2020/2021 kua ta e montantenan di gastunan personal, gastunan material di operashon i gastunan adishonal ku VPCO tin derecho riba nan.