Fransisco Mancelli. Representante di Lead Group yegando korte pa tratamentu 8 di sèptèmber último

Nieuwe Haven—Wes mr. Pieter de Kort ayera a duna un veredikto pa eliminá un beslag imponé pa korte riba e kargamentu di fuel oil na Bullenbaai. Ta trata un kargamentu di kasi 490 mil bari di fuel oil, ku for di ougùstùs 2022 ta formando diskushon den polítika i korte na Kòrsou.

Tabata riba 4 di yüli último, ku e grupo di venezolano representá pa e kompanianan Caribbean Petroleum BV, Business Security and Intelligence Group Socap i Isla Consortium a risibi pèrmit pa imponé beslag riba e fuel oil. Ta trata di e grupo original di Caribbean Refinery ku a split for di e grupo di Erchenel Doran. Entre e dos gruponan a surgi un disputa bastante kompliká kual a resultá den presensia di dos kompania ku tabata tras di kortina Knob Trading kende tabata esun ku tabata pagando Bullenbaai i Lead World Group kende ta pretendé di ta propietario di e fuel oil.

Despues ku e grupo di CPR Holding a logra pone beslag riba e fuel oil, riba 9 sèptèmber Lead Group i Knob a bai korte pa eliminá e beslag i tambe eksihí di Socap un suma di kasi 3 mion dòler ku nan a paga Socap pa hür na Bullenbaai. Tabatin un diskushon bastante amplio den korte ken realmente ta propietario di e fuel oil. Segun tratamentu i dokumentashon, tabata e kompania United Petroleo Corporation tabata propietario di e fuel oil, pero e kompania a bai bankarota. Korte mester sa ta ken ta propietario di e fuel oil, pa averiguá di e beslag imponé tabata korekto. E beslag imponé pa korte na Yüli último a sali for di punto di bista ku ta Knob Trading tabata propietario di e kargamentu di fuel oil. Ta bin sali na kla ku esei no ta bèrdat, pasobra despues ku United Petroleo a bati bankarota na Panamá, e kompania Lead Group a bin claim propiedat di e fuel oil alegando ku United Petroleo tabata debe nan kasi 30 mion florin na pagonan di konsultorio ku nan a hasi.

Korte no Kòrsou no tabata por averiguá e verisidat di e informashonnan, pero a keda konkluí si ku Knob Trading no ta e propietario di e fuel oil. Esaki ta nifiká ku e beslag di 4 di Yüli no ta imponé legítimo i mester kaduká. Korte na Kòrsou no tin sufisiente informashon pa konkluí tampoko si e traspaso di propiedat di United pa Lead ta unu asertá i ta laga e opinion ei sin pista pa verifiká.

E veredikto di wes ta laga portanan hanchu habri riba e ken ta propietario di e fuel oil. Aparte di e promé beslag ku korte a eliminá awor, tin un di dos beslag mas ku Refineria di Kòrsou a laga imponé, kual segun deklarashon di representantenan na RdK, direktor Patrick Newton no tabata sa di dje. E beslag aki ta bira mas interesante ainda, awor ku Lead Group i Knob ke sigui paga pa alokashon na Bullenbaai i saka e produkto.

RdK, tabatin un claim riba Knob Trading pa hür atrasá. Pero segun RdK nan no por sigui tuma sèn serka Knob pa motibu di lisensia OFAC pasobra e fuel oil ku a drenta Korsou no tabatin lisensia. Refineria di Korsou/CRU, den korte a kometé un fayo bastante serio na momento a bisa di no por risibi niun pago for di Knob Trading pa e alokashonnan na Bullenbaai. Ku e deklarashon aki den korte, e kompania estatal di Kòrsou alabes a atmití di no a hasi e diligenshanan nesesario riba e gruponan ku na promé lugá a hür Bullenbaai i na di dos lugá esnan ku a entrega e fuel oil.

Segun RdK, risibi pago for di Knob Trading por pone nan lisensia OFAC den peliger. Pero, RdK a bolbe trata na despista korte, pasobra for di ougùstùs 2022 tabata konosí ku Knob Trading lo a forma parti di e logístiko pa transportá i entrega e fuel oil na Bullenbaai. Tabata un kompania di Panamá, UPC a risibi e kargamentu di fuel oil, komo pago di un debe. UPC ta un kompania di Panamá i supuestamente tabata doño di e kargamentu. Pero, pa UPC por a logra pone e fuel oil den tankinan na Bullenbaai, nan a uza e kompanianan CRU di Kòrsou, Caribbean Petroleum di Kòrsou i  Knob Trading SA, KTSA. CRU i RdK tabata na altura for di prinsipio i tòg a partisipá den entrega di e fuel oil.

Segun investigashonnan, Knob Trading tabata depositá riba kuentanan di e banko Wells Fargo na Estádos Unídos. Durante febrüari 2023 Knob Trading depositá kasi 2 mion dòler riba kuentanan di SOCAP pa por paga CRU, pasobra CPR ya no tabata por a hasi esaki. Ta sospecha ku kasi 2.8 mion dòler di Knob Trading a keda pegá en total, miéntras sosionan tabata pagando nan mes tambe i finansiando biahenan i salarionan riba sèn depositá pa e.o. Knob Trading. E pagonan en todo kaso ta konfirmá ku Knob Trading tabata e kompania finansiando CPR i despues SOCAP pa uzo di e terminal na Bullenbaai. I CPR tabata paga CRU. E sifranan bankario ta konfirmá e finansiamentu di e kompania panameño Knob pa tene e fuel oil den tankinan na Bullenbaai pero tambe pa tene e fasilidatnan na Bullenbaai bou maneho di e grupo venezolano. E kaso ta bia bira mas interesante pa wak si finalmente grupo Doran ta logra saka e fuel oil for di tankinan na Bulllenbaai.