7.1 Experience a wòrdu lográ ku hopi trabou i perserveransia di e dos empresarionan Giovanni i su kasá Angelica Abath.

Willemstad, — Ayera artista Giovanni Abath a habri portanan di Lanthùis Morgenster pa públiko ku e proyekto “7.1 Experience”.  Esaki ta habri pa públiko pa asina por bin i disfrutá di diferente ekspreshon di arte ku e lanthuis ta ofresé.

“7.1 Experience”, ta un soño ku Giovanni huntu ku su kasá Angelica, tabata kana kuné i huntu nan soño a bira un realidat. Angelica a menshoná ku a yega ku e idea na Korpodeko kual tabata un proseso largu di kana pa asina por regla tur e papel i fondo pa invershon. Esaki tambe tabata un proseso kual mester a kana huntu ku Monumentenfonds. Pero a yega asina leu ku riba e dia aki a logra di habri e lanthùis.

E galeria i e tayer lo ta na disposishon pa risibí bishita di tur ku ta deseá , tantu pa turista komo tambe persona nan lokal ku ta atmirá i skucha e historianan di Giovanni su obranan di arte. Tambe tin un parti ku eksposishon di potrèt di partido MAN i potrèt di e promé doñonan di e monumento. Tambe tin artenan ku e bishitantenan por kumpra. I e lanthùis tambe tin un parti kaminda por relahá.

Chesron Isidora di Korpodeko a menshoná ku ta un plaser di tei presente pa selebrá e logro di Giovanni i Angelica Abath. For di 2016 Korpodoko a hasi e pregunta si arte por ta un agente pa desaroyo ekonómiko. Ta asina ku e pareha a aserká Korpodeko pa asina por a kompartí nan idea. Despues di un par di luna a firma pa asina por a kuminsá ku nan workshop na e banda di lanthùis Morgenster. Ámbos pareha ya kaba tabata traha den e workshop i a disidí di stòp ku nan trabounan fiho i kuminsá ku nan ruta empresarial nobo. E pareha a disidí di sali for di nan propio kas pa asina biba den banda di e lanthùis. Chesron Isidora a menshoná ku e pareha aki tabatin e perseveransia pa kontinuá ke proyekto.

Minister Cijntje tambe tabata tei presente na e aperatura i a papia tokante di e importansia di arte den un entrevista ku Vigilante. Minister Cijntje a menshoná ku arte ta krea moveshon, bendementu di arte i e ta un ekspreshon di e artista. Segun minister Cijntje un ekonomia sin arte no ta un ekonomia paso e ta trese hopi moveshon i hopi kreavidat. Esaki tambe ta mustra kon por krese bira un empresa grandi saliendo for di arte. Arte tin un ròl tambe di eduká i forma nos hendenan. Minister Cijntje a menshoná ke ta hopi kontentu di tei presente na e apertura di e galeria.