WILLEMSTAD – Den e promé kuartal di 2023 lo kuminsá ku ehekushon di diferente tema importante ku tin den e Pakete Nashonal (Landspakket Curaçao). Lo start ku algun investigashon tambe, ounke den algun kaso lo hasi start ku retraso. Entre otro lo finalisá e promé plan di akshon pa loke ta trata reforma di Servisio di Impuesto.

Pa loke ta trata maneho finansiero, lo finalisá e investigashon tokante e organisashon dje atministrashon i dje prosesonan di trabou, ku e meta di kòrta den e periodo di entrega i di ouditoria dje kuentanan anual. Tambe ta preparando un kuadro di maneho sosial pa e kambio di organisashon pa e sektor públiko. Lo tuma un desishon polítiko tokante e implementashon di e proposishonnan pa mehorá, saká for di e revishon dje struktura di e servisio públiko superior, e servisio atministrativo i e kuadro di maneho di MD.

Tambe lo finalisá e promé plan di akshon pa reformá servisio di impuesto. Konseho di Minister lo establesé esaki. Denter di poko lo determiná e strategia riba término largu pa e reforma di e sistema fiskal i lo traha un plan di akshon. A kuminsá ku e implementashon di e proposishonnan pa mehorá kaba, ku a sali for di e investigashonnan hasí dje maneho empresarial i e klima di negoshi i di invershon. Awor akí ta kompletando tambe e aktualisashon dje atministrashon di e propiedat di tereno i di propiedat inmóbil. Ta implementando alabes e rekomendashonnan pa e supervishon, revishon i e kòntròl di parti di Inspekshon di Trabou ta mas efikas i efisiente.

Pa loke ta trata kuido médiko, e promé trimèster di 2023 lo ta dominá pa e implementashon di e akuerdonan realisá for di e akuerdo dje kuadro atministrativo tokante e reorganisashon di Curaçao Medical Center (CMC). Hasiendo esaki lo kumpli tambe den gran parti ku e rekomendashonnan di e outoridat médiko hulandes, Nederlandse Zorgautoriteit (NZa), tokante e situashon finansiero prekario di CMC. Gobièrnu ta informá alabes ku a base dje rekomendashonnan dje rapòrt final dje investigashon hasí dje sistema di enseñansa, lo prepará alabes un ‘Roadmap’ huntu ku e partidonan interesá mas importante, pa medio di un ‘Theory of Change’.

E paisnan di Reino ta trahando huntu alabes pa yega na un nivel harominsá di protekshon di datonan personal denter di Reino pa medio di un Rijkswet, esta Lei di Reino. Lo desaroyá i implementá un plan di akshon. Pa loke ta trata esaki lo mester tin un proyekto di lei kla pa yanüari 2023. Durante e asina yamá Justitieel Vierlanden Overleg (JVO) di yanüari otro aña lo presentá e promé parti di e tres kapítulonan di e  lei di konsenso di Reino. Ta trata akí di tantu e teksto legal komo e asina yamá “Memorie van Toelichting” dje kapítulo akí. Despues lo mester tuma un desishon pa loke ta trata e segundo i terser kapítulonan di e proyekto di lei akí.

Otro tema den e Pakete Nashonal, ta ordená e maneho i supervishon di e fondo di kriminalidat. Kòrsou i St. Maarten ta sigui e rekomendashonnan ku tin den e rapòrtnan di Konseho pa Mantenshon di Lei, esta Raad voor de Rechtshandhaving. E paisnan di Reino lo mester a designá un organisashon independiente pa mas tardá 1 di aprel, ku ta supervisá e kumplimentu dje fondo ku e rekomendashonnan, i raportá si e fondo ta funshonando korektamente. E grupo di proyekto enkargá ku esaki ta sigurá di lo traha i entregá e kuentanan anual na Ministerio di Hustisia, pa e por entregá esakinan na Parlamento.