Willemstad—- E dama A. Saveedra  ku tambe tabata den korte a splika ku no tabatin otro salida pa kual e la manda buska su yu menor di edat ku tabata kedando na Venezuela.

E dama Saaveedra ku ta mama di e yu menor di edat ku a bin topa kuné riba e boto di piskado  a splika den Korte ku e mes ta kedando di un forma legal riba nos Pais. E la hui na aña 2018 bini Kòrsou despues ku e tabata wòrdu maltratá i menasa dor di e tata di su yu. Dor ku e la wòrdu menasa ku morto e la opta pa hui bin Kòrsou na unda e la hasi su petishon pa pèrmit  di trabou pa kual e ta disponé di dje i awor ta basta leu ku su trámitenan pa estadia. Aki na Kòrsou e ta trahando i asina ta manda sèn pa su famia na Venezuela. Tur luna e ta manda 800 florin òf mas Venezuela pa asina por mantené su famia ku ta su mama, tata, tanta i tambe su yu.  Entretantu aki na Kòrsou e la kuminsá hasi e trámitenan pa asina por a manda buska su yu.  Su yu tabata kedando serka su tata i tambe su wela. Kosnan a bin kambia ora ku e tata a bin hañ’é den problema na Venezuela i mester a bandoná e Pais bai establesé su mes na Merka. Segun e dama einan tur kos a bin bruha. Na e iglesia ku e tabata bishita e la haña kontakto ku e piskadó Sterling ku tambe sa bishita e iglesia. Segun e dama e tin bon kontakto ku e hòmber Sterling i a kont’é su situashon. Sterling mester a bisa ku ta trata di algu ilegal pero si un dia e logra lo e bini Kòrsou ku e yu pe. E dama a splika ku no tabatin nada di pago pa bai buska su yu  pero si dia ku a bai pa buska su yu e la manda  Keshi i galiña pa e Venezolanonan ku a bin ku e yu.  E dama  a sigui splika ku e kos ta kans’é awor ku e ta mirando ku e la hinka e dos piskadónan den problema  i nan ta detené awor pa su motibu.