PUNDA– No ta un sekreto públiko, ku desaroyonan rondó di refineria i Bullenbaai no ta kana manera mester ta. Esaki ta stroba desaroyo ekonómiko i sosial di nos pais, trahadónan i futuro trahadónan den e sektor aki. MAN den un komunikado, ta sostené pa organisá un kumbre.

Segun Steven Martina di MAN, remarkabel ta e ousensia i falta di asumí responsabilidat di parti Minister Presidènt sr. Pisas bou di ken e sektor aki ta kai i ta laga esaki na “merced” di RDK. E falta di vishon i direkshon ta mustra ta hopi di lamentá. Si nos bai bèk den historia di e sektor aki semper tabata e Minister Presidente ku tabata duna direkshon i asumí responsabilidat di e sektor aki.

Segun e tolda blou, tempu ku Shell a bai for di Kòrsou, Minister Presidènt sra Maria Liberia Peters a asumí su responsabilidat, duna kara, duna direkshon i lo mas importante trese gremionan huntu den e sektor aki i riba nivel di polítiko ku un meta komun: sòru pa desaroyo di nos pais i trahadónan. E responsabilidat aki bou di Gobièrnunan ku a sigui no tabata otro, èks Minister Presidentenan, Schotte, Asjes, Whiteman, Koeiman i Rhuggenaath tur a asumí nan responsabilidat komo Minister Presidente pa e sektor aki. Ta di lamentá, ku aktualmente banda di falta di transparensia i vishon koherente riba desaroyonan pa ku destino di refineria i Bullenbaai Minister Presidènt Pisas i no ta asumí su responsabilidat.

Mirando ku no tin ningun transparensia i vishon ta importante pa segun konvenshonnan i rekomendashonnan di parti ILO,  relashoná  ku diálogo  sosial tripartit,  Sentral Sindikal di Kòrsou(SSK) ta pidi pa organisá un kumbre huntu ku tur “stakeholder” den e sektor. Na e momento krítiko di ki direkshon nos mester bai konhuntamente , mester pone tur gremio di interes huntu. Asina konhuntamente ku Minister Presidènt sr. Pisas pa bini ku direkshon komun di desaroyo den sektor pa próksimo 5, 10 i 20 aña, MAN a bisa finalmente.