Skalo– MC International Management B.V. i Manrique Capriles & Sons B.V. a hasi petishon (provishonal) di protekshon di bankarota (suréance van betaling)

Ayera, Korte di Promé Instansia a konsedé MC International Management B.V. i Manrique Capriles & Sons B.V., protekshon di bankarota por medio di suspenshon di pago, i nombra mr. A. Huizing komo administrado. Manrique Capriles ta un di e distribuidornan den produkto farmaseutiko i di medikamento na Kòrsou. E motibu prinsipal pa e suspenshon di pago aki, ta kanselashon di un akuerdo di distribuishon ku un di nan sumistradornan di mas grandi na ougùstùs 2023, kual lo finalisá na fin di mart 2024.

E kanselashon aki ta nifiká un rekaída substansiál den fakturashon di e kompania, kompará ku na aña 2022. Pa motibu di e rekaída aki, Manrique Capriles no por garantisá ku e lo por sigui kumpli ku su obligashonan finanserio. Na aña 2020 Manrique Capriles a implementá algun redukshon di gastu. Por lo tanto, no ta posibel pa redusí e gastunan di e kompania aún mas tantu. Banda di esei, Manrique Capriles no a logra haña un otro distribuidor ku lo por kompensá e rekaída den forma parsial of na largo plaso.

Pa e motibu aki Manrique Capriles a solisitá Korte di Promé Instansia pa suspendé su obligashonan di pago temporalmente. Den e kuadro ey, Korte di Promé Instansia a ordená un periodo di grasia (afkoelingsperiode). Esaki ta nifika ku ningun terser partido por imponé riba propiedatnan ku ta den man di Manriqe Capriles. Manrique Capriles, den estrecho koperashon ku e administrador lo sigi den kombersashon ku posibel partnernan potensial, i tambe sondea posibilidat pa traspasá algun aktividat di e kompania. Di e manera aki por mantené kuponan di trabou i kreditornan lo por kuminsa risibi pago. Manrique Capriles ta hasi su máksimo esfuerso pa keda kumpli manera debe ser ku e suministrashon na tur su botikanan. E suspenshon di pago no ta aplikabel riba e empresa ruman di Manrique Capriles na Aruba. Manrique Capriles na Aruba ta ketu bai un kompania viabel i finansieramente saludabel.