Willemstad, — Auto Busbedrijf Curaçao lo pone èkstra bus disponibel djadumingu dia 24 di sèptèmber  pa esnan ku ta deseá di bishita Museo Tula na Lanthùis Kenepa.

Fundashon Museo Tula (FMT) den koperashon ku Ministerio di Enseñansa, Siensia, Kultura I Deporte ta organisá pa mas persona por yega I bishita Museo Tula na Lanthùis Knip. Den esaki lo pone èkstra bùs disponibel pa personananku ta deseá di bishitá e gran apertura di Siman di Kultura djadumingu awor. Autobus Bedrijf Curaçao ta duna èkstra servisio den kuadro di Siman di Kultura i pone èkstra  bùsnan disponibel, banda di e ruta normal di Lagun/Knip,  ku ta sali kada ora for di parada di Bus na Otrabanda kuminsando 8.30 di mainta.

Preis ta fl 2,50 salida Otrabanda pa Kenepa i  fl 2,50 salida Kenepa pa Otrabanda. E skema di orario ta lo siguiente, saliendo for di Otrobanda:  8.30/ 9.30 / 11.00 / 12.00 / 13.00 / 14.00 / 15.15 / 17.00 / i 19. 00. Lo sera e kaya ku ta pasa dilanti di Lanthùis Kenepa pa tráfiko di motor. Parkeerplaats banda di e museo ta reservá solamente pa esnan ku ta forma parti di e ekipo di trabou i esnan ku ta bin bende nan produktonan.

Tur otro persona ku ta deseá di bishitá e aktividat di apertura na Museo Tula i ku ta bini ku outo, por parker na fèlt di bala Julio “Jul” Stroop na Lagun. Lo tin bus chikitu  (vèn) ta kore kada mei ora pa hiba hende na Lanthuis Kenepa kual ta grátis. Tambe lo ta bai tin vigilansia pa outo.