Punda– E último dianan aki diferente medio di komunikashon a notifiká tokante denunsia ku a ser entregá dor di Banko Sentral di Kòrsou i Sint Maarten (CBCS) kontra Ennia i personanan ligá na Ennia. Banda di esaki a lanta e impreshon ku apesar di e denunsia, Ministerio Públiko no a kuminsá ku un investigashon.

Ministerio Públiko kier aklará esaki. A tuma e denunsia di CBCS den tratamentu i tin un investigashon penal ku ta andando pa un tempu kaba. E investigashon ta wòrdu kondusí dor di RST bou di responsabilidat di e Tim Sentral di Ministerio Públiko. Den e fase aki di e investigashon, Ministerio Públiko no por duna mas informashon pa loke ta trata kontenido di e investigashon, hustamente pa motibu ku e investigashon ta andando. Ministerio Públiko ta konsiente ku problemanan relashoná ku Ennia ta un preokupashon den nos komunidat i pa e motibu aki manera ta posibel, lo informá komunidat.