Abogado Conquet a  ku otro   artíkulo interesante . Pa  tuma kontakto ku abogado Conquet por hasi esaki via email nobo ku ta [email protected] na e numbernan 5270622 / 7880157.

Willemstad, — Informashon riba leinan ku ta regarda hür di espasio, ta hopi importante pa partidonan den e tempu aki. Awe nos ta para ketu na e derechi di e hürdó pa suspendé pago di hür, esta di stòp temporalmente ku pagamentu di hür, pa motibu di defekto na e espasio di hür.

Den práktika esaki ta pasa ku regularidat. Mester bisa sinembargo, k’un suspenshon  kompletu di pago di hür, pa tempu indefiní no ta pèrmití pa lei. Pa kuminsá e motibu pa suspendé pago di hür mester ta hustifiká. Mosaikonan ku a lanta, man di porta ku a kibra, baki laba tayo ku ta lèk, no ta hustifiká suspenshon di pago, sigur no kompletu. Korte di Kasashon, añanan atras a stipulá ku no por stòp kompletamente di paga hür. Segun korte e defekto na e espasio mester ta sufisiente serio ku esaki ta stroba ‘plaser di hür’ di e hürdó, na Hulandes yamá huurgenot. Mas aleu e suspenshon di pago mester tin konekshon ku e defekto. Banda di esakinan, e doño di espasio mester ta na altura di e defektonan I tambe ku esakinan ta stroba ‘plaser di hür’ di e hürdó.

Pa duna un ehèmpel, problema ku berpùt ku ta manda holó malu i kousa plaga di bestia rondó di e kas ta un defekto sufisiente serio ku ta hustifiká suspenshon parsial di pago di hür. Den e kaso ei, mester pone doño di kas por eskrito na altura di e situashon i dun’é tambe un tempu rasonabel pa drecha e defekto. Si esaki no sosodé, e hürdó por suspendé pago di hür di forma parsial te ora drecha e defekto. Por skohe tambe pa laga drecha e defekto i despues dedusí e gastunan for di pago di hür. P’e doño di espasio ta mas difísil pa wanta ku kumplimentu ku su obligashonnan pa ku e hürdó. Si tin un situashon kaminda e hürdó no ta pagando, e doño no por kambia slòtnan di porta I stroba e hürdó di drenta e espasio, pasobra esaki ta ‘direkshon propio’ na Hulandes yamá ‘eigenrichting’ i ta prohibí pa lei. Tampoko por laga sera awa i/òf koriente asinasina. Por pensa por ehèmpel si riba restrikshon di konekshon ku Internet i/òf di otro servisionan kumbiní. Sinembargo, e posibilidatnan p’e doño ta hopi limitá i e mester atendé ku e koutela nesesario, ora tin inkumplimentu na banda di e hürdó.