Curt Belfor, Ofisina di Telekomunikashon i Post

Punda—E proseso pa yega na un kalidat di gasolin i diesel mas haltu, ta yega na momento kaba di “flush out” e miksto bieu entre e kombustibel nobo i esun bieu. Esaki ta lokual direktor di Ofisina di Telekomunikashon i Post, Curt Belfor a duna di konosé.

Segun Belfor, durante e entrega di gasolin i diesel tin un kadena logístiko unda tin diferente gruponan di interes. Miembronan den e gruponan di interes lo sinta huntu i wak kiko ta bai bira e siguiente pasonan, pa lokual ta trata e presensha di un kalidat nobo di gasolin. E parti mas importante ta pa laga e proseso di “flush out” tuma lugá. Esta e proseso unda tin un periodo ku den e tankinan lo tin e produkto bieu i esun nobo pareu. Ta bini un proseso di informashon unda lo bai splika Kòrsou kon e proseso di “flush out” ta bai tuma lugá, segun Belfor. Aparte di e proseso di informashon, lo tèst un periodo tambe pa averiguá si lokual tin na kombustibel nobo ta kuadra ku

Segun Belfor a splika ku tabatin e trayekto enkaminá di SGS Insipre. Ta trata di un kompania renombrá ku a duna rekomendashon pa drecha e kalidat di kombustibel ku Kòrsou mester uza. . E parti mas importante den nan konseho ta e kantidat di suafel ku mester baha for e nivel haltu di 1000 ppm. SGS Inspire segun Belfor, pa por a yega na e kalidat rekerí, a tene kuenta ku spesifikashonnan di Kòrsou, manera e.o. e klima. E direktor a mustra ayera ku tin un spesifikashon nobo pa e kalidat. Un otro aspekto ku e la trese dilanti ta un dekreto nobo. Ta bini un dekreto nobo ku ta bai duna e spesifikashonnan di e produkto nobo.

Segun Belfor e liñanan di guia nobo, kual Gobièrnu ta bai apliká,  ta enserá e konseho di SGS Inspire. Ta trata di un liña di maneho i lo bira e promé piedanan pa ankra esaki den un malchi legal.  Mas aleu, e parti di opservashon i mantenshon lo keda inkorporá den e lei tambe, pa asina tin reglanan ankrá pa outorisá e institutonan konserní pa aktua.