ROTTERDAM—Den un kantidat di entradanan na Polonia i Spaña outoridatnan a desmantelá un banda di droga internashonal riba sospecho di trafikashon kokaina i mariwana.

Banda di kokaina ku mariwanan tabatin tambe amfetamina den truknan di karga di berdura i fruta. E ret a pasa e droga di kontrabanda den truknan di karga di Spaña pa Polonia via Hulanda i Alemania. Investigashon ta indiká ku e ret tin vinkulonan ku hooligans di vario klupnan di futbol. Durante investigashon polis polako ku spaño a detené desena di hende i konfiská 260 kilo di mariwana, amfetamina i kokaina ku un balor total di 3 mion euro. anteriormente tabatin entradanan di polis spaño i Europol serka miembronan di organisashon kriminal kaminda a detené 42 sospechoso inkluso lidernan. Den aprel 2023 a detené 20 sospechoso na Polonia i Spaña den algun entradanan kordiná den dos paisnan. Aki a konfiská mei mion euro kesh den diferente valuta. E prome akshon kontra e ret kriminal a tuma lugá den aprel 2022 ora a detené 7 sospechoso pa trafikashon droga. Bou di kapa di batata ku nan a transporta for di Spaña, outoridatnan a konfiská 158 pakete di mariwana. E sospechosonan detené tabatin 51 pakete mas di mariwana ku tambe a keda konfiská. den investigashon a pone un relashon entre e grupo aki ku un otro kontrabanda di 3 tonelada di mariwana na balor di 30 mion euro. E kriminalnan a pasa e kontrabanda den truknan via Hulanda ku Alemania.