Publikashon di CDC ta analisá i kompará efektividat di e bakuna di Pfizer kompará ku Moderna.

PUNDA- Segun publikashon di Sentro di Kòntròl i Prevenshon di Enfermedat (CDC) e bakuna kontra Covid-19 desaroyá pa Pfizer BioNTech ta ménos efektivo kontra enfermedat severo i hospitalisashon a largo plaso kompará ku e bakuna desaroyá pa Moderna.

Datos kolektá na Merka entre mart pa ougùstùs ta sugerí ku e bakuna di Pfizer ta redusí e riesgo di hospitalisashon kousá pa infekshon ku Covid-19 ku 91% e promé kuater (4) lunanan despues ku a risibí e segundo shòt di bakuna. Sinembargo, sifra di CDC ta mustra ku despues di 120 dia, e protekshon aki ta baha te ku 77%.

Mientrastantu, e bakuna desaroyá pa Moderna a demostrá un efektividat di 93% pa redusí riesgo di hospitalisashon e promé 4 lunanan i un efektividat di 92% despues di 120 dia.

E informashon aki ta interesante pa epidemiologo i ekspertonan ku ta analisá kasonan di infekshon ku Covid-19 entre personanan bakuná i no bakuná den nan poblashon.

Na Merka mas ku mitar di e poblashon ta bakuná ku e bakuna di Pfizer, esaki ta pone ku e porsentahe di “breakthrough infections” ta relativamente haltu kompará ku paisnan kaminda e poblashon a bakuná ku otro marka di bakuna.

Mirando e sifranan publiká pa Merka, por hasi algun komparashon i spekulashon tokante e trayekto di Delta na e islanan den Reino. Manera nos a bin ta informá últimamente, hermana isla Aruba a raportá ku kasi 40% di nan infekshonnan, kousa pa e brote aktual, ta bou di personanan kompletamente bakuná i kasi 20% di mortonan kousá pa Covid-19 ta personanan kompletamente bakuná.

Sifranan publiká na pa tim di epidemiologia na Kòrsou tokante kasonan di infekshon serka personanan bakuná ta mustra ku di e kasonan kousá den e ola aktual 20-25% ta personanan bakuná.

Un motibu pa e diferensia den dato entre Aruba i Kòrsou por ta uso di e bakuna di Pfizer. Aruba ta hasi uso di e bakuna di Pfizer pa bakuná nan poblashon i esnan ku ta deseá por skohe pa e bakuna di Johnson & Johnson. Na Kòrsou personanan ku ke bakuná por skohe si nan ta deseá e bakuna di Pfizer òf Moderna.

Sinembargo, no ta konosí ki porsentahe di e poblashon ta bakuná ku e bakuna di Pfizer òf di Moderna.

Ta importante pa realisá ku e análisis konduktá ta trata protekshon kontra enfermedat severo, hospitalisashon i morto. E protekshon kontra re-infekshon no a keda analisá den e kaso aki debí ku ta mas importante pa raportá esnan ku ta desaroyá síntoma i òf malesa severo miéntras nan ta kompletamente bakuná.