WILLEMSTAD – Korte di Promé Instansia a tuma un desishon importante resientemente den un kaso entre un trahadó i su èks dunadó di trabou.

Ta trata di un dama ku tabata hasi trabou di limpiesa, ku a bai Korte eksigiendo pago di salario ku e no a risibí i tambe kompensashon. Korte a disidí di duna e dunadó di trabou e espasio pa proba ku e no a paga e dama ménos plaka manera e dama ta pretendé. E dama tambe a haña chèns pa proba ku kontrali na nan akuerdo, e no a traha 4 pero 5 dia pa siman. E kaso ta sigui fin di luna akí.

E dama a entregá su petishon na Korte dia 30 di novèmber aña pasá i e tratamentu dje kaso a tuma lugá riba 24 di yanüari último. Durante e tratamentu a sali na kla ku e dama a kuminsá traha komo limpiadó na novèmber 2017 te sèptèmber 2019. Despues el a stòp di traha i a kuminsá bèk na yanüari 2021, te mart 2023. Durante e periodo akí e no a risibí salario mas i tabatin un desakuerdo tokante pago. E trahadó ta pidi Korte pago di salario atrasá i kompensashonnan. E petishon dje dama na Korte ta enserá outorisashon pa hasi e prosedura gratuitamente, i pa kondená su èks dunadó di trabou pa paga algu mas di 11 mil florin, mas 50% di interes di tardansa.

Komo base di su petishon, el a menshoná ku e dunadó di trabou a paga ménos plaka durante yanüari 2021 te ku òktober 2022 i ku despues a para e trabou sin respetá e término di notifikashon (“opzegtermijn”) di 1 luna. Ku otro palabra sin a dun’é sufisiente tempu pa prepará su mes pa e konsekuensianan dje desishon. El a alegá ademas ku durante e periodo ku e tabata traha, e no a haña fakansi (pagá). E dunadó di trabou a pidi Korte pa rechasá e petishon pasó el a paga tur loke a akordá, ku ademas tabata mas ku salario mínimo. El a para ariba ku ta e dama mes a kita for di trabou di forma boluntario.

Korte a studia e akuerdo i a tuma den konsiderashon entre otro e salario akordá, e kantidat di oranan trahá, e término di notifikashon i dianan di vakashon. Korte a konstatá ku no tabatin un kontrakt definitivo entre e partidonan tokante e terminashon di e empleo. Komo ku tin un desakuerdo tokante e salario akordá, kaminda e trahadó ta alegá ku e no a risibí pago di forma adekuá, Korte a duna pèrmit na e dunadó di trabou pa presentá pruebanan dje pagonan. Korte a konkluí ademas ku e trahadó tin derecho riba un término di notifikashon i kompensashon, pasó no ta trata di un retiro boluntario.

Korte ta kalkulá ademas ku e trahadó ainda tin dianan di vakashon ku e mester kobra, pero mester hasi investigashon adishonal tokante e kantidat di oranan trahá pa dia. Korte a dikta finalmente na promé lugá ku e dama por hasi e prosedura sivil akí gratuitamente. Korte a disidí ademas di duna e dunadó di trabou e espasio pa proba ku e no a paga e dama solamente 900 florin pa luna, pero minimal 1.200 florin. I e dama mester proba ku kontrali na nan akuerdo e no a traha 4 pero 5 dia pa siman. E kaso ta planiá pa sigui dia 27 di febrüari awó.