Rueda di prensa huntu ku representantenan di CHATA, MEO i minister, CTB i CPA.

WILLEMSTAD, — E di tres konferensha di prensa di aña 2023 den kuadro di turismo a keda organisá. Den e konferensha tabata tei presente: CHATA, MEO i minister di desaroyo ekonómiko, CTB i CPA.

Minister Ruisandro Cijntje a menshoná ku ta pruebá ku turismo ta e pilar di mas grandi di desaroyo di pais Kòrsou. Hopi biaha ta relatá turismo na e sektor ku ta paga ménos, pero mirando e desaroyo i e vishon ku tin, ke kambia e bista ku tin pa ku esaki. Minister a menshoná ku turismo no ta un sektor ku ta mal pagá òf kaminda tin ménos entrada. Turismo ta un sektor ku ta brinda hopi, un sektor ku ta kresiendo i por bira profeshonal den dje.

Sam Ayoubi di Curacao Ports Authority a splika durante e konferensha ku den e último aña, e sektor di turismo krusero i esnan ku ta yega for di barku ta normalisando kompará ku anterior. Sam Ayoubi  a elaborá ku a mira un bezetting di e barku stabil i un “afdrage” di 85% kual ta nifiká ku nos ta kresiendo ainda i ta yegando na e kapasidat normal di 90%. Te ku desèmber ta proyektando ku alrededor di 295 barku lo yega Kòrsou ku un total di 710.000 pasahero. Sam Ayoubi a elaborá ku mas ku 80% di e pasaheronan ku lo yega Kòrsou ku barku ta di e merkado Merikano.

Mimi Luttge, presidente di CHATA, a menshoná ku nos tin mas o ménos 70 hotèl ku alrededor di 5500 kamber kual ta konsistí di hotèl chikitu i grandi. Luttge a elaborá ku den e promé 9 lunanan di 2023, nos okupashon di kamber a subi ku 1.8% i e tarifa promedio diario a subi ku 1% kual ta un bon desaroyo. Nos entrada di kamber disponibel a subi ku 10.8% i ku ora nos kompará Kòrsou ku otro destinashonnan den Karibe, nos a rekuperá un tiki mas lihé segun e splikashon di e presidente di CHATA. Mas aleu, Luttge a remarká ku ainda tin merkado pa oumentá nos tarifanan di kamber.

Hugo Clarinda, Direktor Athunto di Ofisina di Turismo di Kòrsou (CTB), a menshoná ku den e promé 9 lunanan di aña 2023, Kòrsou ta e pais ku a presta mas mihó kompará ku otro destinashonnan den Karibe. Den e promé 9 lunanan Kòrsou a haña 419.000 turista ku a yega Kòrsou, kual ta un kresementu di 18% kompará ku aña pasá. Den e di kuater kuartal por menshoná ku Kòrsou ta e number tres kompará ku otro destinashonnan riba lista di kompra di ticket di buelo.

Hugo Clarinda, Direktor Athunto di Ofisina di Turismo di Kòrsou (CTB ) a menshoná ku for di Venezuela lo ta bai tin un kantidat di stulnan adishonal ya komo e merkado venezolano a habri bek i nos tin 3 aereoliña ku lo bula ruta di Venezuela i den novèmber lo tin e di 4 aerolina. Hugo Clarinda a menshoná ku e aña aki tabatin komo target 525.000 turista den aerolina pero lo kaba e aña aki 550.000 turista den aerolina. Otro aña ku tur e buelonan ekstra ku lo tin, e meta ta oa yega e target di 650.000 turista.