Minister di Hustisia, mr. Shalten Hato

PUNDA–  Manera ya ta ampliamente konosí, Minister di Hustisia, mr. Shalten Hato den su plan di maneho a pone énfasis riba invershon den kapital humano.

Vários organisashon den Ministerio di Hustisia manera entre otro Kuerpo Polisial Kòrsou  i Sentro di Detenshon i Korekshon Kòrsou (SDKK) a konosé e asina yamá ‘’personeelstop’’ pa basta aña.
Adishonalmente pa medio di VVU i penshun un kantidat konsiderabel di personal a bandoná i lo sigui bandoná e organisashonnan ya menshoná. Den Kuerpo Polisial for di 2018 no a tuma hende i na SDKK ta for di aña 2013 a fortifiká e organisashon. Mirando e situashon aki Minister Hato a yega na e konklushon ku mester kuminsá ku e proseso di reklutashon mas pronto ku ta posibel.

Sinembargo palabrashonnan hasí den e Landenpakket i tambe limitashonnan finansiero a pone ku esaki no por a sosodé mesora. Hopi análisis i kalkulashonnan a wòrdu hasí den Ministerio di Hustisia konhuntamente ku organisashonnan den e Ministerio pa asina yega na e fórmula pa por realisá e reklutashon nesesario aki.  Riba petishon di Minister Hato, Konseho di Minister a bai di akuerdo ku un plan di largo plaso den kual den añanan benidero, en todo kaso te ku 2026 por reklutá un kantidat di polis i bewaker pa SDKK pa por kumpli ku e nesesidat  di komunidat.

Ayera djaluna 21 di ougùstùs 2023, komo titular di Hustisia Hato a anunsiá ku ta publiká e vakaturanan pa e funshon di Aspirant politieagent na KPC i Aspirant beveiliger medewerker na SDKK, kaminda tur esnan ku ta kumpli ku eksigensianan por solisitá. Si bo tambe ke bin duna un aporte na un di e organisashonnan solisitá mesora. Pa mas informashon por subi www.gobiernu.cw òf  página di Minister Shalten Hato riba Facebook.