WILLEMSTAD,—-No tin duda ku e fiesta ku ta bai tin djasabra awor den WTC lo bai bira un fiesta grandi i sigur un fiesta kaminda ku dos legendario kantante ta bai topa otro kara kara. Esta Urvin “Luwi”Jano i Boy Thode.

Por sierto mester bisa ku esaki lo bira e último fiesta den WTC sigur pa tres òf asta por tira un luna mas ariba. Esei ta dependé kon e trabounan ku ta bai tin lo kana i tambe ta bin aserka ku ainda mester wak ta ki dia e èrkonan i tambe otro materialnan ta yega Kòrsou. Pasobra ta na momentu ku e materialnan yega Kòrsou por bisa eksakto den kuantu luna e trabou ta kaba.

Biniendo bèk riba e fiesta di djasabra awor, ta asina ku no ta un sekreto ku djasabra awor agrupashon musikal Tune tambe ta bai forma parti di e bataya musikal ku ta bai tin kaminda ku e legendario kantante “Luwi Jano” ta presentá ku dos agrupashon musikal. Pues Luwi lo presentá ku e Fuertisimonan di GIO pero tambe ku e Stret Konstantnan di Tune.

Pero tabata ayera ku Vigilante Farándula a haña di komprendé ku durante di e presentashon di agrupashon musikal Tune e popular kantante Jill Frans tambe lo bai tei pa asina e sostené Urvin “Luwi”Jano. Pa loke ta trata djasabra awor e kos lo bai bira piesa bin, piesa bai. I manera a bira konosí ayera den korant Vigilante e kantante ku sali for di e porta dilanti lo bai topa ku e legendario kantante arubiano Claudius Philips den luna di desèmber aki na Kòrsou.