Komo Pueblo, “HUNTU NOS TA FUERTE” den e selebrashon Dia di Bandera den Bònt. Un i tur ta BON BINI.

Willemstad: Fundashon Bisiñanan di Bònt pa 26 aña konsekutivo ta brinda Pueblo e selebrashon kustumbrá Dia di NOS Bandera di Kòrsou.

E Fundashon di Bònt ta hasi tur lokual ta na su alkanse, HUNTU ku empresanan privá, instanshanan sosial kultural i tambe Gobièrnu di Kòrsou brinda nos Pueblo e selebrashon di Dia di Bandera 2 di yüli. Nos Himno I Bandera ta símbolo di un Pais mara na su mes identidat, su kultura i su dushi lenga Papiamentu. Nos mester laga Amor pa Patria i Lealtat pa Pais resaltá mas profondu den nos kurason i sirbi nos Pais komo Yu di Kòrsou. E aña aki selebrando 26 ana Dia di Bandera den Bònt, na nos humilde opinion ta e momentu pa nos para ketu i realisá ku ta huntu ku komunidat nos a i ta karga e aktividat aki ku orguyo. Mirando e akogida grandi ku e selebrashon aki tin  di suidadanonan di Kòrsou, sin duda Bònt ta e gran sitio di Ambiente riba 2 di yüli 2023 tambe.P’esei Bònt su tema pa e aña aki ta : HUNTU NOS TA FUERTE! Pasobra ya pa años hopi ta duna nan sosten, aporte i yudansa ku union pa nos logra ku forsa di tur un Dia di Bandera éksitoso. Pa por demostrá ku “HUNTU NOS TA FUERTE”tin diferente organisashon ku ta bin partisipá i duna di nan parti pa engrandese e ambiente den Bònt. Nos Programa mas amplio ta sigui despues.Pero si nos ke kuminsá anunsia algun grupo ku ta huntu ku nos den e selebrashon. Un skol tan konosí di Bario, Sta. Rosa de Lima College, ta preparando pa selebrá huntu ku nos. Skol i Bario ta konekta na otro, p’asina nos por mira nos hubentut representá den e aktividat aki. Tambe un otro prestigioso organisashon ku ta duna servisio na komunidat, ta JCI Willemstad, su miembronan ta presente pa duna hóbennan i interesadonan informashon tokante di JCI Willemstad. Lab de Med tambe a “join the party” pa duna servisio na komunidat riba tereno di salubridat, nan lo ta hasi pruebanan di preshon i suku etc. pa esnan ku ta interesá. HUNTU NOS TA FUERTE di bèrdat, p’esei Fundashon Bisiñanan Kontentu di den Bònt ta yama un kaluroso Bon Bini na tur e instanshanan aki. Keda pendiënte pa nos programa, pasobra nos lo ta bai tin mas aktividat di Sorpresa. E aña aki nos ta pone enfasis na apertura ku un grandioso Alabansa pa HUNTU ku suidadano di tur Bario nos inklina dilanti Dios Tata i pidi E pa Restourá i Sana nos Pais Kòrsou. Esaki ta tuma lugá 14:00 (2’or).