Presidente Asosashon di Médikonan, Jerry Semper

Bon Bini Senter—Ayera mainta, manera anunsiá dòkternan di kas a tene un reunion di kuater ora, pa diskutí i deliberá riba e problemátika pa instituí un pòst pa médikonan di kas, e asina yama HAP (na hulandes Huisartsenpost). E sentro mester a drenta na vigor entrante 1 di mart, pero gobièrnu aktual ni tampoko e gobièrnu(nan) anterior no a kumpli.

E Asosashon di Médikonan di Kas, (CHV) mediante nan presidente dr Fitzgerald Jerry Semper a splika ku pa 4 di Aprel próksimo nan ta spera di tin un solushon konkreto di parti di gobièrnu. Segun Semper, médikonan di kas tin por lo ménos 12 aña ta trahando bou di kondishonnan ku no ta korelá ku e desaroyonan moderno den nan práktika di medisina. E médikonan di kas a opta pa skohe na bienestar di pashènt i traha 12 aña largu bou di e kondishonnan aktual sin ta kobra pa nan esfuersonan.

E presidente tabata bastante honesto na momento e la menshoná ku gobièrnunan anterior no tabatin atenshon, pero tòg nan miembresia ayera a sinta bastante sinseridat den e dos ministernan ku tabata presente durante nan reunion di ayera. Tantu Promé Minister Pik Pisas komo Minister di Finansas Javier Silvania tabata presente durante e reunion, kende e último alabes fungi komo minister interino pa Salubridat Públiko.

Ayera tabatin un deliberashon entre e dos ministernan i direktiva di e asosashon di médikonan di kas. A keda kumbini ku den 4 siman e problema ta solushoná, esei aló ménos segun deklarashonnan di Jerry Semper. Pa yega na un solushon, naturalmente e dos ministernan tabata kier tin mas informashon lokual a keda kumbini ku den e siman aki, ta tene un di dos konsulta entre e ministernan di direktiva di e asosashon.

Segun Semper, si e problema no ta solushoná den 4 siman, esta riba 4 di aprel próksimo, médikonan di kas no por sigui karga e responsabilidat di duna kuido den por ehèmpel oranan di mardugá i despues bolbe wak pashènt mainta. E esfuerso ta simplemente demasiado segun e médikonan di kas. Pa 4 di Aprel si no tin un solushon, “portanan ta sera” segun Semper. Seguidamente lo informá pueblo di Kòrsou, CMC, Inspekshon Médiko i Gobièrnu na un manera nechi kon pa risibi kuido.

Pero, mester tene kuenta ku e kaminda pa kuido general, no ta serka e médiko di kas mas. Esei miembresia a disidí kaba. Ta bini kambionan drástiko segun Semper. Tur pashènt master mèldu na CMC pa kuido. Konsekuentemente Gobièrnu ta responsabel pa ekipá CMC despues di 4 di Aprel próksimo. E kuido ta un responsabilidat di Gobièrnu segun Semper a divulgá ayera na medionan di komunikashon.

Semper a bisa ku ta trata di un problemátika di por lo ménos 90 médiko di kas, ku ta trahando sin un HAP. Boneiru i Aruba tin un HAP i ta Kòrsou ta trahando sin unu, kual ta inaseptabel den époka moderno. Semper tabata agradesido ku e ministernan a bini, pero “mester wak pa kere”, el a duna di konosé finalmente.